El xuráu del gallardón que concede la Red Asturiana de Desarrollo Rural (Reader) valoró la candidatura d’esta ganadera d’El Valledor que cuenta con 250 femes reproductives de la raza autóctona, amás de 18 yegües; esta edición presentáronse un total de 37 nominaciones
Ganadera y persona mui venceyada al territoriu, como amuesa’l so cargu de secretaria de la parroquia de Samartín y de presidenta de l’Asociación de Mujeres del Valledor (AMUVA), que reúne a 80 muyeres d’esti valle asitiáu na xuntura ente Samartín y San Salvador, n’Allande, Úrsula Villabrille resultó escoyida ayeri ‘Mujer Rural de Asturias 2026’, gallardón que concede la Red Asturiana de Desarrollo Rural (Reader) dendel’añu 2018. Nesta ocasión taben sobre la mesa 37 candidatures presentaes polos Grupos de Desarrollo Rural del Principado de Asturias, qu’optaron pola d’esta criadora de cabra bermeya n’ecolóxico, que’l 15 d’ochobre va recibir el so reconocimientu n’A Veiga, nel Auditorio Félix Menéndez de la Casa Cultura, onde-y va ser entregada una escultura diseñada a costafecha pol artista asturianu Kiko Urrusti.
Al frente de Ganados Bedramón, qu’entamó nel 2010 con 26 años, onde cuenta con 250 femes reproductives de la raza autóctona, amás de 18 yegües, el xuráu valoró «la capacidá de lideralgu» de l’allandesa, amás de la so puesta en valor del territoriu, una parroquia rural de monte que sufre una importante perda de población a lo llargo de los últimos años y que trabayar por recuperase de les quemes del 2011 y 2017. Tamién la incorporación de nueves teunoloxíes, como l’usu de collares de xeollocalización y drones pa controlar los sos animales, pa lo que tuvo que formosa como pilotu d’estos aparatos.
Dende AMUVA, amás, pretende crear una cooperativa territorial de muyeres, acompañada del estudiu d’una futura quesería artesanal que permita tresformar y dar mayor valor a la producción ganadera del propio territoriu. Esto ye, construyir oportunidaes nueves a partir d’actividaes tradicionales d’El Valledor.
