POR BORJA PINO Y PABLO R. GUARDADO
El buque, una de les ayalgues de la naviera estauxunidense Oceania Cruises, capaz de tresportar a 1.250 pasaxeros, viose forzáu a poner proa a Asturies un día enantes de lo planificao por mor del mal tiempu qu’arrecia sobre la mariña francesa
La mar nun entiende de regles, nin de protocolos, ni d’inútiles intentos humanos de tenela baxo control. Entruguen a cualquier marín verdaderu; de xuru que nun duldará en confirmalo. Asina, en cuestión de minutos —pocos, con frecuencia—, un plácidu día de navegación, marcáu por agua calmao y aire suave, pue tresformarse nuna poderosa galerna qu’obligue a tirar pela borda tolos planes iniciales, y a improvisar sobre la marcha pa, utilizando la esperiencia, los conocimientos y los recursos disponibles, evitar problemes serios. Y eso ye lo que tuvo que facer güei llunes el capitán del cruceru MS ‘Marina’, una de les perles de la naviera estauxunidense Oceania Cruises. Inmersu nuna travesía qu’entamó’l 4 de setiembre na población británica de Southampton, l’inmensu buque debería pasar esti día na pintoresca comuna francesa de Saint-Jean-de-Luz/Donibane Lohizune, na oriella del golfu de Bizkaia. Sicasí, les condiciones meteorolóxiques adverses fixéronlo imposible, forzáu un cambiu de rumbu que traxo al navíu a Xixón venticuatro hores enantes de lo previsto. Pel momentu, desconozse de qué mou esa circunstancia inesperada afectará a les escales restantes.
Con 238,35 metros d’eslora, 32 de manga, un caláu d’hasta 7,32 metros y un nada despreciable pesu brutu d’hasta 66.084 tonelaes, el ‘Marina’ púnxose en grada el 10 de marzu del 2009 nos astilleros Fincantieri, en Genova/Zêna. Botóse n’abril del añu siguiente, y en xineru del 2011 fixo’l so primer viaxe, atracando en Miami y siendo ellí amadrináu pola estrella televisiva estauxunidense Mary Hart. Dende entós, y magar la so veteranía, exerce como ún de los buques más queríos d’Oceania Cruises; tal ye asina qu’en 2024 tuvo una fonda remodelación, modernizándose tanto los equipos de navegación, como los agospios y servicios para el pasaxe. Esti últimu pue algamar les 1.250 persones, atendíes por una tripulación que raspia los 800 profesionales. Y nun ye, nin muncho menos, un desconocíu pa Xixón; prueba d’ello ye que nel 2022 recaló na ciudá asturiana hasta tres vegaes. Ye más, esti mesmu añu regresará otra vuelta; concretamente —y si la meteoroloxía nun impón cambios—, el 29 de setiembre, dando’l relevo al so ‘compañeru’ MS ‘Insignia’, de la mesma naviera, y coincidiendo n’El Musel col tamién familiar ‘Ventura’, de P&O Cruises.
Polo que respeuta a la travesía en cursu, y a la espera de posibles reaxustes nel calendariu, el ‘Marina’ tendría qu’alcanzar Xixón a les siete de la mañana d’esti martes y, depués de diez hores d’escala, poner proa hacia A Coruña, penúltimu altu enantes de Porto, el 24 de setiembre, y Lisboa, puertu nel que, el 25, finalizaría el viaxe. Sicasí, el suyu será un descansu curtiu; esi mesmo día, a les cinco de la tarde, l’enorme buque soltará amarres de nuevo, y pondrá proa hacia’l norte, nuna travesía más curtia que finalizará’l 2 d’ochobre en Bilbao.
