L’eventu qu’axunta a productores y profesionales del sector va desenvolvese del xueves al domingu, con una tastia abierta a la ciudadanía’l sábadu nel marcu d’AGROPEC; «pretende ser es un puntu de referencia internacional sobre la sidra y tolo que l’arrodia», afirma la organización
Llagareros de Noruega, Hungría, Bulgaria, Francia, Italia, Rusia… Inclusive de puntos d’otros continentes, como Chile o Xapón, van desplazase a Xixón pa participar ente’l xueves y el domingu nel Salón de Sidres de Gala d’Asturies (SISGA), que cumple dieciséis ediciones. Va participar «hasta una sidra d’India, que tenemos mucha curiosidá por saber qué ye lo que da de sí», apunta Carme Pérez, vicepresidenta de la Fundación Asturies XXI, organizadora d’esti eventu pensáu pa productores y profesionales del sector, pero que tamién tien el so momentu pal públicu xeneral. Va ser el sábadu de 12 a 15 horesy de 17 a 20, pela tarde, cola tastia abierta nel ‘Salón Asturias’ del Palaciu de Congresos del Recintu Ferial d’Asturies Luis Adaro, onde va desenvolvese tamién esta fin de selmana AGROPEC, la Feria del Campo y de las Industrias Ganaderas, Forestales y Pesqueras.
En total, van tar presentes en Xixón 311 productos de 116 llagares de 35 países. «Esto da una idea de la pluralidá, de la diversidá que va mostrar esti eventu, que va poner con esta diversidá y esta pluralidá a Xixón y a Asturies nel epicentru del mundu de les sidres modernes, de les sidres innovadores, de los nuevos productos que tán trabayando por conquistar un mercáu cada vez más complicáu y más difícil», espresa Pérez. Asina, esplica, «nun ye sólo un eventu de sidra; non sólo botelles y copes. Lo que quiximos dende’l principiu, l’ADN d’esti eventu, lo que pretende, ye xunir productores, dende la mazana a la botella; profesionales de la gastronomía; turismu; cultura profesional; intercambiu profesional; cooperación internacional… Creo qu’eso, pasu a pasu, vamos algamándolo y nesta edición va vese entovía muncho más reflexao».
Marcos Abel Fernández, presidente de la Fundación Asturies XXI, tuvo tamién na presentación que tuvo llugar na mañana d’ayeri nel salón de receiciones de la Casa Conceyu, al igual que Guzmán Pendás, conceyal de Servicios Sociales, Vivienda y Cooperación, pola imposibilidá d’acudir finalmente de la vicealcaldesa Ángela Pumariega; Pedro Baldó, del restorán El Duque; Antonio Migoya, direutor de la Fundación Gijón Rural; y Álvaro Alonso, secretariu xeneral de la Cámara de Comercio. «Si nun tuviéramos el so apoyu, financiación, nun podríamos abarcar un eventu d’estes carauterístiques», finalizaba Pérez. «Lleguemos a estos niveles gracies a la collaboración que tenemos, de les instituciones lóxicamente, pero sobre manera, y préstame dicilo equí, gracies a la collaboración del voluntariáu», ampliaba Fernández.
«Ye un eventu multidisciplinar. Equí nun se vien namás a tomar sidra nin a falar namás de cómo ye’l mercáu de la sidra; equí ta’l tema de la enoloxía, de cómo s’ellabora’l productu, de les característiques del productu, pero tamién del tema gastronómicu, el tema de los maridaxes», valoraba l’organizador, que destacó’l fechu de que «somos l’únicu casu qu’esiste nel mundu de la sidra, y creo que del vinu tamién, nel que los propios llagarerosexercen de xuraos. Esto ye importante porque si nosotros punxéramos a entendíos especialistes na sidra asturiana, tendríen mui difícil valorar una sidra d’Alemaña».
Por último, esplicó que, anque’l SISGA entama’l xueves, el miércoles yá va haber actos pa los llagareros que tean presentes en Xixón, y avanzó que’l Gobiernu de Madeira va presentar formalmente’l so ingresu na Rede Europea de Ciudades de la Sidre, cola posibilidá de qu’ésta aumente con otru llugar portugués y un ‘concello’ gallegu. L’asamblea añal d’esti organismu va tener llugar el vienres pela mañana na Cámara de Comercio al mesmu tiempu que n’El Duque va desenvolvese la tastia de los 311 productos participantes esti añu nel SISGA per parte de los llagareros. Éstes van poder prebase’l sábadu nel actu abierta al públicu previo pagu de 10 euros. Mentes, tolos asistentes a AGROPEC, cola entrada, van tener derechu a una consumición.
«Pretende ser es un punto de referencia internacional sobre la sidra y tolo que l’arrodia», enfatizó Fernández enantes de que Pérez concluyera l’actu destacando, frente al cuadru que preside’l salón de receiciones, que «Xovellanos taría arguyosu de tar equí, taría arguyosísimu de ver esta Asturies, el progresu d’esta Asturies nel sector de la sidra, y lo lloñe que tamos llegando».
