L’alcuentru de la industria que coneuta’l mercáu estatal y l’internacional, sobre manera’l llatinoamericanu, va contar cola participación de la banda con orixe en Xixón y Villaviciosa por mor d’una convocatoria de la Conseyería de Cultura destinada a grupos de la comunidá pa presentar el so talentu nel certame vascu
L’equipu de programación de BIME escoyó a Axolotes Mexicanos ente les más de 50 bandes asturianes que se presentaron a la convocatoria entamada pola Conseyería de Cultura, Política Llingüística y Deportes p’acceder a esti alcuentru de la industria que va tener llugar del 27 al 30 d’ochobre en Bilbao dientro de la so estratexa pa favorecer la profesionalización y promoción esterior de la música de la comunidá. En concreto, el grupu con orixe en Xixón y Villaviciosa va ufrir una actuación curtia en formatu ‘showcase’ (presentación) énte profesionales de la industria musical, amás de participar en BIME Pro, l’espaciu profesional onde se van mostrar les tendencies más nueves del sector, que cuenta con actividaes de formación y que ye amás puntu d’alcuentru profesional y comercial.
Olaya Pedrayes, Stephen J. Lyne, Lucas de la Iglesia, Juan Pedrayes y Mario del Valle, éstos dos últimos integrantes tamién de Carolina Durante, conformen esta banda con influencies punk y pop nacida nel 2012 y con una reconocida trayeutoria qu’agora van poder ampliar a otros mercaos internacionales, sobre manera’l llatinoamericanu, nel BIME. Esti eventu creóse nel 2013 pa xenerar oportunidaes de medría económica, cultural y rellacional p’artistes, profesionales, empreses y públicos venceyaos a la música y dende’l 2022 tamién se celebra en Bogotá. El programa articúlase alredor de BIME Pro, centráu nos retos, tendencies y oportunidaes de la industria, y el BIME Live, qu’ufierta conciertos y ‘showcases’ en dellos escenarios de la ciudá. Estes actuaciones dexen a artistes y formaciones presentar el so trabayu énte programadores de festivales, promotores, representantes, medios de comunicación y otros axentes del sector.
Descuentos y presencia tamién de la sidra asturiana
La collaboración del Gobiernu asturianu con BIME va permitir, amás, que profesionales del sector musical asturianu puedan beneficiase d’un descuentu del 50 % nel certificáu presencial de BIMEPro. La ufierta tien como tope 20 places, que se van asignar por orde de solicitú, pa lo qu’hai qu’unviar un corréu electrónicu a eventos@turismoycultura.asturias.es. Amás, pa favorecer conexones ente los axentes que se dean cita en Bilbao, Asturies va participar institucionalmente entamando una xornada de ‘networking’ con profesionales de la industria musical asturiana, onde tamién van probase productos de la comunidá y sidra asturiana.
