El 3 d’ochobre del 2006 espublizábase nel BOPA’l decretu aprobáu en Conseyu de Gobiernu el 20 de setiembre d’esi añu qu’afitaba los nomes de llugar tradicionales como los únicos oficiales del conceyu, términos qu’entaríen a valir al día siguiente
«Ye un patrimoniu cultural que nun podemos perder; forma parte de la nuesa tradición cultural», asegura Ramón d’Andrés, entós responsable de Política Llingüística del Gobiernu y secretariu de la Xunta Asesora de Toponimia
Xixón, oficializáu na forma billingüe Gijón/Xixón que permite la Llei d’Usu y Promoción del Bable/Asturianu del 1998 pa ciertos casos concretos como esceición, y otros topónimos tradicionales como Cimavilla, Llavandera, Montiana o L’Abadía Cenero recuperaben güei va 20 años, el 3 d’ochobre del 2006, pesu y espaciu al ser declaraos únicos nomes de llugar oficiales. Yera la fecha na que salía espublizáu nel Boletín Oficial del Principáu d’Asturies (BOPA) el decretu aprobáu poco enantes, el 20 de setiembre, pol Conseyu de Gobiernu llueu de ser aprobáu en Plenu municipal, el 3 de marzu, por unanimidá, Corporación formada entós por PSOE, PP y Izquierda Xunida-Bloque por Asturies.
Convertíase asina’l conceyu nún de los primeros en completar un procesu de recuperación toponímico qu’entamaron Carreño, El Franco y Llanes en mayo del 2005 y que sigue entovía pendiente de completar: Cuideiru, Allande, Ibias y Navia son los cuatro únicos pendientes, en distintes etapes de tramitación del espediente, de los 78 conceyos asturianos. Una ventana qu’abría la citada Llei d’Usu, nacida d’un alcuerdu del PP y el Partíu Asturianista (PAS), posibilidá na que s’enfotó Ramón d’Andrés, director de Política Llingüística del 2004 al 2007, baxo mandatu socialista en gobiernu de coalición con Izquierda Xunida-Bloque por Asturies. «Punxi esti tema ente los prioritarios», recuerda’l filólogu.
«Había unos decretos aprobaos del 2002 que regulaben el funcionamientu de la Xunta de Toponimia y qué oxetivos tenía, qu’impulsé cola ayuda del director xeneral del que yo dependía, Carlos Madera. Lo único que quedaba yera echalo a funcionar», sigue D’Andrés, qu’amplía que «cuando yo llegué al cargu dixi qu’una prueba de que les coses funcionaben yera que s’empezaren a aprobar decretos de toponimia». A lo poco yeren realidá los primeros, a los que siguierons esi mesmu 2005 Gozón, Llangréu, Ḷḷena, Villaviciosa, Sariegu, Bimenes y Cabranes. Llueu diría Nava, yá nel 2006, y depués Xixón, toos ellos con D’Andrés, como responsable de Política Llingüística, nel cargu de secretariu de la Xunta Asesora.
Los pasos del procesu
Pero, ¿cómo ye esi procesu? «Reglamentariamente entama pidiéndolu’l Conceyu o entamándolu’l Principáu d’oficiu, pero siempre se fixo a petición del Conceyu», esplica D’Andrés. «Lo que primero que se fai ye tomar como referencia los topónimos del conceyu del catálogu que publicó l’Academia de la Llingua nel añu 2000 (‘Nomes de conceyos, parroquies, pueblos y llugares del Principáu d’Asturies’), nomenclátor que se toma como referencia; ye namás el puntu del partíu, porque falten munches coses. Entós lo que fai la Xunta de Toponimia ye un trabayu de campu, mirar a ver los topónimos dudosos; hailos que nun tienen duda, pero otros son dudosos, pueden tener varies formes, polo que se manden a encuestadores, filólogos, pa que vayan a ciertos puntos del conceyu a entrugar a la xente, a entrugar a los meyores falantes cómo se diz el nome de tal o cual sitiu».
Un vez que se termina esti llabor, «la Xunta de Toponimia manda un primer llistáu al Conceyu pa que lu mire, lu revise, lu discuta, etc. El Conceyu pue facer tamién consulta a la vecindá, ponelu a esposición pública, falalo con asociaciones… Lo qu’estime oportuno». Darréu, dende l’Ayuntamientu pueden dirixiste al órganu «pa dicir qu’esta llista ta bien o esta lista ta bien pero hai que mirar estos tres topónimos», dalgo que se revisa. Y finalmente, cuando yá hai alcuerdu sobre dicha llista, llévase a Plenu. Ehí apruébase y depués la Xunta de Toponimia eleválu al Gobiernu d’Astruries, que lu aprueba en Conseyu de Gobiernu». El pasu final ye la so publicación nel BOPA, pasando asina a ser los únicos oficiales en sustitución de los que teníen esi calter anteriormente.
«Nunca se fixo nada a espaldes de los conceyos», apunta D’Andrés, que sigue siendo miembru de la Xunta Asesora de Toponimia. L’espertu recueerda «perfectamente’l casu de Xixón»: «Hubo munches reuniones ente representantes de la Xunta de Toponimia y el conceyal d’entós, Tino Venturo, que yera l’interlocutor normal; cola alcaldesa también, Mapi (Paz Fernández Felgueroso), y con un técnicu de Xeografía y Territoriu, Agustín Lanero. Aparte, Xixón tien una Oficina de Normalización que collaboró tamién. Foi un ambiente mui guapu», rememora.
Nesti puntu, valora’l filólogu que «daquella, nosotros díbamos a todos los conceyos que pidíen la toponimia y nun sabíes estremar d’ideoloxíes. Falabes con xente de cada conceyu, entusiasta de la toponimia, y unos podíen ser d’Izquierda Unida, otros del PP… Nun distinguíes ideoloxíes, había un alcuerdu absolutu y total». Y en Xixón, tamién, como demuestra que s’aprobara’l llistáu por unanimidá.
L’Humedal o L’Umedal
«Nun hubo nengún problema», insiste. «Hai ocasiones nes qu’un mesmu topónimu pue tener dos o otres versiones populares y dase-y a escoyer al Ayuntamientu. Asina, fiximos dalgunes precisiones al Ayuntamientu pa qu’escoyera la que más-y interesaba. Un casu ilustrativu ye L’Humedal: nosotros propunximos que fuera sin ‘h’, L’Umedal, porque nun tien que ver con ‘húmedo’, sinón con ‘umeru’, que ye un árbol; d’umedal, onde había plantación. D’eso hai muncha documentación, de Xovellanos, etc. Asina, propunximos que yera un equívocu ponelo con ‘h’, que meyor s’escribiera ensin ella, pero’l Conceyu prefirió que siguiere con ‘h’, igual qu’El Natahoyo, onde la ‘h’ sobra», valora. Foi un ampliu trabayu’l fechu en Xixón,onde se recoyeron 750 topónimos, con un llabor d’investigación de campu nel que participaron Iván Huerga Antuña, Llinu Álvarez Santidrián, María Xosé Rodríguez López, David Guardado, Fernando Álvarez-Balbuena, Elena González González, Marián García y Pelayo Muñoz Duarte.
Otru tema aparte ye l’usu que se fixo después en tolos conceyos nos que s’aprobó la recuperación toponímica, que n’opiniones de munchos, quedó en papel moyao. «Ye comprensible qu’al otru día de publicase’l decretu nun vayan poder cambiase toles señales, porque ye dineru. Entós eso ye un procesu paulatín que tien que dir el conceyu tando al tanto d’ello. Hai conceyos que nesto son mui rápidos y otros que se duermen. Ye verdá que lleven ritmos mui desiguales y a veces frustrantes», asegura D’Andrés, qu’apunta que «depués d’aprobase la Xunta de Toponimia manda’l llistáu al Institutu Xeográficu Nacional pa qu’eso se reconoza, porque los decretos hai que tener en cuenta que son d’aplicación pa toa España».
Lo siguiente, la toponimia xeográfica
Volviendo a Xixón, l’espertu apunta que «ye de los conceyos que más puxa pola toponimia oficial. Hai dalgunes carencies, pero creo nun ye de los que lleven más galbana na so aplicación. Veo bastante presencia del topónimu Gijón/Xixón y otros; el nome de Cimavilla veólu yo yá en tolos sitios, que tamién se cambio daquella, un exemplu d’un nome nel que nun hai que xustificar nada porque tol mundu diz Cimavilla». Y ye que, en tolos casos, hai un llabor seriu detrás. «Trabáyase con muncho rigor. Lo que pasa ye que, depués, cuando llega a la opinión pública, entós hai ehí factores. Por exemplu, hai topónimos asturianos que tán en boca de tol mundu. Entós, a nadie-y estraña qu’un sitio que se llamaba Las Bobias pues se llame Les Bobies, porque ye que lo diz hasta’l gatu. Claro, n’otres ocasiones el topónimu asturianu ta mui erosionáu pola presión del castellanu; entós, dizlo a lo meyor el 10% de los vecinos d’un sitiu. Nun tamos diciendo nenguna mentira, lo que pasa ye que la percepción pública puede tar más dificultada yá pa percibilu como un topónimu xeneralizáu», analiza.
Ye ésta la única forma «de que nun se pierdan. La toponimia ye un patrimoniu cultural, nun podemos perdelu. Forma parte de la nuesa tradición cultural». «Afírmolo con rotundidá: Nunca nengún topónimu lu inventare la Xunta de Toponimia. Nun se dedica a inventar nada», sentencia.
El siguiente pasu, pendiente entovía de completar esti procesu colos cuatro conceyos pendientes, va ser el de recuperación de la toponimia xeográfica, esto ye, los nomes de ríos, montes, playes, cabos… Otru llabor importantísimu, porque, apunta d’Andrés, «nel ámbitu rural, los falantes que llamen a estos sitios van desapaecer. Hai que conservalo, ye un patrimoniu que nun podemos perder». Y pon un exemplu: «El nome del ríu Nalón nun se va perder, porque amás coincide col castellanu, o’l del Picu Urriellu, pero ónde ta que sea oficial eso. Hai infinidá de nomes por oficializar».
