L’historiador percuerre nesti poemariu la memoria reciente de l’Asturies trabayadora dende una mirada na que’l recuerdu personal y el coleutivu van de la mano; el xuráu destacó’l fondu conocimientu que l’autor demuestra na obra de la lliteratura asturiana
Rafael Rodríguez Valdés incorpora’l so nome al llistáu de ganadores de Premiu Xuan María Acebal de poesía qu’entrega la Conseyería de Cultura, Política Llingüística y Deporte dientro de los Premios Lliterarios. La so obra ‘Histories d’una familia obrera’, que percuerre la memoria reciente de l’Asturies trabayadora desde una mirada na que’l recuerdu personal y el coleutivu avancen xuntos, convenció al xuráu del gallardón, qu’entrega una recompensa de 6.000 euros y la espublización del títulu.
Antón García, direutor xeneral d’Aición Cultural y Normalización Llingüística, presidió’l mesmu, que tuvo conformáu polos filólogos Rodrigo Olay, Iris Quintana, Alba González Sanz y Taresa Fernández Lorences, y la ganadora de la edición pasada, Sofía Fernández Castañón con ‘Esti amor asturfalante’, con Laura Marcos, del Servicio de Planificación y Normalización Llingüística, como secretaria. L’acta destaca la solidez con la que se constrúi’l poemariu y la so capacidad pa entellazar les vivencies personales cola esperiencia de toa una xeneración hasta componer una biografía que ye, al empar, voz íntima, política y xeneracional. D’igual forma, valorá’l conocimientu fondu de la lliteratura asturiana que demuestra l’autor, que resultó ser Rodríguez Valdés, historiador nacíu n’Uviéu nel 1978 que dende esti añu, depués de la xubilación d’Esther Prieto, ta xunto a Samuel Castro al frente d’Ediciones Trabe, onde dende’l 2019 vien dirixendo la coleición ‘Calume’ de traducciones planificaes al asturianu dende otros modelos lliterarios.
Esti premiu llega amás nun añu importante pal escritor, qu’en mayu asoleyó’l títulu ‘El motor de la historia’ con artículos espublizaos por él ente’l 2004 y el 2024 que muestren la so trayeutoria d’edición, divulgación, investigación y reflexón de la historia contemporánea d’Asturies.
Los otros Premios Lliterarios
El fallu del Xuan María Acebal llega después de que se produxera’l del XVIII Premiu Alfonso Iglesias de cómic, que foi p’Arantza Margollespor ‘Slečno’; del XXXII Premiu Máximo Fuertes Acevedo d’ensayu, pa Ramón Lluís Bande por ‘La mirada ordenada’; del XIX Premiu María Josefa Canellada de lliteratura infantil y xuvenil, pa Paula Pulgar por ‘Secretos’; del XLVII Premiu Xosefa Xovellanos de novela, pa Sidoro Villa por ‘Camín de Meri’; y del VI Premiu Florina Alías a la meyor traducción, pa Henrique Facuriella pola torna de ‘Caleyos de la memoria’ de la brasileña Conceição Evaristo, orixinalmete ‘Becos da memória, precisamente de la coleición ‘Calume’ dirixida por Rodríguez Valdés.
