L’autora de ‘Güelu Ismail’, primer novela ganadora del Xosefa Xovellanos escrita por una muyer, y hasta agora copropietaria d’Ediciones Trabe, ta en fase de creación lliteraria, lo que ye una bona noticia pa les nueses lletres; meses depués de la so xubilación, repasa nesta entrevista una carrera dedicada a los llibros
Esther Prieto, cabraliega nacida n’Iruña nel 1960, vive la so xubilación con satisfaición. Atrás queden 26 años dedicaos a la edición n’asturianu en Trabe, primero como correctora y depués como copropietaria con Samuel Castro. Dexa la editorial nun bon estáu de salú y el tiempu llibre que gana ta dedicándolu a, ente otres coses, retomar la creación lliteraria que’l trabayu al frente de la empresa nun-y permitía. L’añu qu’entra, anuncia l’autora d’obres como la novela ‘Güelu Ismail’ o’l poemariu ‘La mala suerte’, podríamos volver a disfrutar del so talentu.
¿Cómo ta siendo esta etapa nueva de la so vida?
Distinta. Ye una etapa que, si llegues bien de salú y mentalmente, ye estupenda.
La xubilación vieno acompañada d’un fiesta sorpresa con collacios y compañeros na Llibrería Trabe en marzu. ¿Cómo recuerda esi día?
Con cariñu, y con un cierto plasmu. Nun m’esperaba llegar a Trabe, porque me llamaron pa dir a firmar unos papeles, y atopar a tanta xente. Agradezse y faite pensar que tan mal nun lo fixisti.
Tamién recibió un reconocimientu del Gremiu d’Editores d’Asturies… ¿Presta que se valore’l trabayu de tantos años?
Sí ho, presta que lo valoren y que te muestren cariñu.
Naquella xuntanza en Trabe pidieron-y que dedicara’l mayor tiempu llibre pa escribir. ¿Ta faciéndolo?
Si-y digo la verdá, toi en fase d’escritura. Tuvi unos meses desfaciéndome de tou. Llevar una editorial ye un trabayu mental; físicu, pero sobre manera mental, qu’a min, a lo menos, impidíame facer otra cosa intelectual como la escritura. Entós tuvi ehí unos meses de, cómo-y dicir, de llimpiar la cabeza y empezar a lleer lo que m’apetez, lo que considero que me pue beneficiar a la hora de poneme a escribir, y creo que nesti momentu yá toi empezando a sentir que puedo volver a escribir.
«Cuando llegué a la universidá y contacté con un grupu de xente qu’escribía yá n’asturianu y reivindicaba l’asturianu como llingua de cultura, foi cuando empecé a escribir n’asturianu; dime cuenta que yera la llingua cola que yo m’encontraba a gustu al escribir»
¿Cómo foi’l so entamu como escritora?
Dende pequeña siempre escribí. Primero en castellanu, evidentemente, porque tola educación y tola cultura yera en castellanu. Depués, yá cuando llegué a la universidá y contacté con un grupu de xente qu’escribía yá n’asturianu y reivindicaba l’asturianu como llingua de cultura, foi cuando empecé a escribir n’asturianu. Llegáu’l momentu dime cuenta que yera la llingua cola que yo m’encontraba a gustu al escribir.
¿Trabayó dende un primer momentu la poesía?
De pequeña escribí poesía, pero enantes de poesía escribí, tendría 11 años, una novela a la manera de ‘Los Cinco’, la serie aquella de noveles xuveniles. Siempre me consideré poeta, lo qu’agora yá nun tengo tan claro, la verdá.
El primer llibru que publica ye ‘El curiador d’estrelles’, un llibru infantil.
Sí, cola Academia de la Llingua Asturiana en collaboración con Eva García. Creo que foi nel añu 87 y foi la mio primer esperiencia de publicar dalgo n’asturianu.
Depués llegaríen el Teodoro Cuesta, poemarios y una novela, ‘Güelu Ismail’, la primera d’una muyer que ganaba’l Xosefa Xovellanos. ¿Por qué hai tan poques escrites por muyeres n’asturianu?
Foi nel 2001, ex aequo con Pablo Rodríguez Medina, y tuvi la suerte de ser la primera. Siempre paez qu’una novela da más prestixu, lo que nun sé si ye xusto o inxusto. Y depués a acá, publiqué mui poques coses.
Sobre la entruga, yo creo qu’eso ta rompiéndose un poco. El Xosefa Xovellanos ganólu l’añu pasáu Marina Pangua y hai voces nueves qu’escriben novela y ensayu, como Beatriz Quintana o Arantza Margolles, ente otres. Tienen munchu talentu y son moces la mayoría menores de 40 años, polo que tienen munchu futuru per delantre.
¿Cuándo entra a trabayar en Trabe?
Nel añu 2000 como correctora. Tamién m’inicié n’otros llabores, como rellacioname colos autores. Antón García vendió depués la editorial a Inaciu Iglesias y dende’l 2007 al 2012 tuvi al frente d’ella como trabayadora, momentu nel que la intención d’Inaciu yera pesllar. Samuel Castro, otru trabayador, y yo propunximos-y siguir con ella. Dende entós, yá tuvi cola función plena d’editora de recibir orixinales, rellacionate colos autores, decidir qué se publica o qué no se publica, y correctora tamién nesti casu.
¿Cómo ye sacar alantre una editorial que trabaya mayormente con una llingua minorizada como ye l’asturianu?
Nun sé si será más complicao o menos. Ye un trabayu silenciosu, ensin munchos aspavientos. De lo que se trata ye saber qué se ta moviendo nel mercáu, qué autores tán saliendo, procurar facete con ellos y procurar ayudalos, que la so carrera lliteraria siga medrando con calidá, que ye la función d’un editor o d’una editora.
«Que siga habiendo autores n’asturianu yá ye un milagru, porque hai poca compensación; nin social nin económica»
¿Ye un milagru qu’un idioma na situación de la llingua asturiana tenga tanta calidá lliteraria?
Solamente que siga habiendo autores n’asturianu yá ye un milagru, porque hai poca compensación; nin social nin económica. Depués, como en toa lliteratura, hai distintes calidaes, pero creo qu’hai nomes suficientes con calidá como pa poder dicir que la lliteratura asturiana nesti momentu tien muncha calidá. Y amás, ye llamadero qu’hai xente bastante moza que sigue manteniendo un asturianu mui natural, que ye lo fundamental; un asturianu de llingua materna o ambiental, polo menos, y eso la verdá ye que te da un poco d’optimismu.
¿Qué ye lo que fai falta pa que gane más espaciu?
Creo qu’a la lliteratura asturiana falta-y visibilidá. La falta d’oficialidá ye’l problema fundamental, pero tenemos esa falta de visibilidá y otru problema, que ye que, polo que sía, nun somos quien a pasar más allá de Payares y interesar a un públicu de fuera d’Asturies. Y a eso ayudaría muncho la traducción. L’asturianu tien muncha tradición de traducción d’otres llingües al asturianu; lo que nos falta ye qu’otres traduzan del asturianu.
Echando la mirada atrás, ¿qué ye colo que se queda de toos estos años?
Fundamentalmente, na edición, dexar Trabe 34 años depués d’Antón García nuna situación creo yo que mui bona, siendo un referente cultural n’Asturies y, a nivel mui pequeñín, siendo conocida tamién n’otros llugares que nun son Asturies. Eso creo que ye porque fiximos bien lo que fiximos.
¿Queda en bones manes agora con Samuel Castro y Rafael Rodríguez Valdés?
Sí, claro. Samuel lleva en Trabe 23 años y sabe perfectamente lo qu’hai que facer y cómo facelo, y Rafa ye una persona que conoz perfectamente’l mundu lliterariu asturianu, el mundu editorial y el mundu del asturianu. Yo creo que formen un tándem escelente pa que Trabe siga p’alantre.
Pa finar, ¿cuándo tendremos noticies suyes?
Espero que pa l’añu qu’entra. Tengo cosines sueltes, pero tampoco nada mui avanzao, polo que tampoco quiero soltar una fecha porque yo soi mui lenta nel procesu de creación.
