Sofía Castañón abrió esti xueves ‘Superficies de contactu’, que va contar cola participación nos meses próximos de los escritores Berta Piñán, Marta Mori, Diego Solís, María Esther García López y Esther Prieto
Un averamientu al arte dende la escritura. Ye lo que pretende ‘Superficies de contactu’, el ciclu nuevu de LABoral Centru d’Arte y Creación Industrial, coordináu por Inaciu Galán, qu’arrancó ayeri cola participación de Sofía Fernández Castañón. La xixonesa encargóse d’inaugurar esta iniciativa de creación lliteraria al traviés del diálogu con autores del Archivu d’Artistes Asturianos/es, un procesu qu’entama con una inmersión nos fondos pa escoyer un artista y una obra como puntu de partida pa desenvolver un testu, al traviés de la investigación, yá sía poesía o rellatu, pero tamién ensayu, crónica o otres formes híbrides. Pa rematar, entámase un alcuentru col públicu pa compartir el resultáu del so trabayu y contar la esperiencia.
Castañón escoyó a Alicia Jiménez, y depués de l’apertura del actu por Semíramis González Fernández, direutora xerente de LABoral, y d’un diálogu con Galán, lleó al públicu’l testu que preparó. Un alcuentru que s’allargó per una hora y na que la escritora faló de lo qu’ella descubrió de l’artista y lo que-y influyó no qu’escribió, asina como de la interacción ente les diferentes artes.
La siguiente autora en somorguiase nel Archivu va ser Berta Piñán, el 17 d’avientu a les 18.30 hores. Diego Solís (18 de febreru), María Esther García López (8 d’abril) y Esther Prieto (19 de mayu) completen esti ciclu novedosu nel que los materiales del fondu dexen de ser namás oxetu de consulta pa convertise tamién en puntu de partida de creaciones nueves. Esti alcuentru ente artistes y escritores va permitir ampliar les formes d’acercamientu a les obres del depósitu, xenerar conocimientu dende disciplines distintes y contribuyir a la visibilidá de la creación artística asturiana y del propiu Archivu.
