El gaiteru de Bañugues de 29 años apuesta dende 2022 por tener presencia nestes canales al tiempu que trabaya por amestar los soníos tradicionales colos más modernos; «hai que tirar perhí», valora’l tamién direutor de la Banda de Gaites Cabu Peñes
Foi la BZRP Music Session #52, la tan cantada «quédate» del canariu Quevedo col productor arxentín Bizarrrap, la que sirvió a Daniel Meré pa dase a conoceren redes sociales. Con una base trabayada y los sones de la so gaita consiguió llamar l’atención de miles de persones, sobre manera de fuera d’Asturies. Una posibilidá, la que dacanales como Tik Tok o Instagram, que dende entós emplega pa dar conocer la gaita asturiana. «L’oxetivu ye dignificar l’instrumentu», asegura.
‘La Graciosa’, tamién de Quevedo, en collaboración con Elvis Crespo; el clásico ‘Thriller’ de Michael Jackson; ‘Superestrella’, d’Aitana; o ‘La vereda de la puerta de atrás’, d’Extremoduro, son los temes últimos d’una llarga llista preparada por esti gaiteru que tien l’honor de ser ún de los tres alumnos de la primer promoción del Grau Superior d’Instrumentos de la Música Tradicional y Popular d’Asturies del Conservatoriu Superior de Música del Principáu d’Asturies. Una formación llarga qu’entamó na escuela de Bañugues de la mano de Bras Rodrigo. «Él foi polos colexos de Gozón con un papelín pa enseñar gaita y tambor. Yo debía tener 7 años y apuntéme a la gaita y llueu la mio hermana al tambor», recuerda. El so debú foi nel 2006, «con 9 años cola Banda Gaites de Corvera nes fiestes del Carme de Bañugues y d’ehí p’alantre», sigue. La enseñanza elemental fíxola en Candás y la profesional y superior, n’Uviéu, estudios que completó con un FP de Turismu, y agora comparte la so dedicación al instrumentu col trabayu nun hotel y un master de Formación del Profesorado pa dar clase de música o de gaita, cola idea tamién d’estudiar el del Patrimoniu Musical y sacar el doctoráu.
Una axenda bien cargada que completa cola direición de la Banda de Gaites Cabu Peñes. «Namás acabar el conservatorio superior, nel 2022, a los meses, yá que nun puedo quedar paráu, empecé a dar clases de gaita equí, nel mio pueblu, en Bañugues, col apoyu de la asociacion de vecinos. Dexáronme un llocal y la verdá ye que s’apuntaron bastantes guaḥes. Notábase qu’había gana nel conceyu qu’hubiere dalgo de gaita. Y foi tan simple como qu’un día me dixeron que taba bien un día tocar toos xuntos el repertoriu que tenemos», rememora. El resultáu, foi una actuación nes fiestes, momentu nel que Meré concluyó que «yá había basante xente pa montar una banda gaites. N’abril del 2024 punxi una fecha pal primer ensayu, llamé a otros gaiteros que sabía qu’había pela zona, y arrancamos».
Dende entós, nestos dos años, esta formación gozoniega que cuenta con unos 15 miembros vien ganando presencia. «Empezamos dende lo más baxo posible, caún col so instrumentu y con un repertoriu mui básicu. Nel entamu-yos dixi que lo primero ye tener un repertorio que nos diferencie y yo creo que yá lu tenemos. De momento ye too repertoriu d’Asturies, anque yá comenzamos a xugar con repertoriu de fuera tamién. Sicasí, la nuesa filosofía ye que la mayor parte sía asturianu», esplica. La collaboración del Conceyu, col que cuenta con un conveniu, ye fundamental, y la presencia nes fiestes y les cites más importantes ye habitual. «Ye lo que más arguyu me da de tou esti procesu», asegura.
Neños que quieren tocar la gaita polos sos videos
Y ente toes estes ‘obligaciones’, cuélase tamién la creación en redes sociales. «Siempre me gustó subir videos de mio tocando. Mesmamente, na canal de YouTube que tengo hai videos vieyos faciéndolo», diz. «En determináu momentu decidí xubir un videu a TikTok, que ye una rede social na que too viralízase mui rápido, onde llama l’atención lo que la xente nun ta avezadaa ver, y entós de sópitupones una gaita asturiana… Viralizóse enforma», recuerda sobre aquel tema de Bizarrap y Quevedo. En concreto, matiza, foi depués de ver una versión d’esi cantar en saxofón nel Benito Villamarín, campu del Betis. Tiempu depués podría facer lo propio nel estadiu de los sos amores, El Molinón, enantes d’un partíu del Sporting, «anque esi día llovió y nun pudi facer lo mesmo que nel Villamarín», recuerda.
«A partir d’ehí fui faciendo más versiones. Dalgún guaḥe del pueblu apuntóse a tocar la gaita gracies a los vídeos y dalgún compañeru, profesor de gaita, díxome que-y vinieren tres o cuatro guah.es diciendo que queríen deprender a tocar la gaita pa tocar esi cantar. Eso ye lo que m’impulsó a siguir subiendo esti tipu de vídeos. Al final, yo creo que ye una responsabilidá pa col instrumentu».
Asina, va siguir xubiendo versiones de cantares populares a les redes sociales al tiempu que trabaya en buscar caminos nuevos pa la gaita asturina. «Ta poco esplorao emplegala con soníos más modernos. Hebo pioneros, como Manolo Quirós, qu’utilizaba soníos naquella época distintos y creo qu’hai que tirar perhí», asegura. Ehí tán les collaboraciones con Eva Hevia y el gallegu Kike Varela, que «tien un proyeutu con Álvaro Puga, un gaiteru gallego, que se llama ‘electrofoliada’, que consiste en mezclar música de DJ con música tradicional y gaita. N’Asturies, eso taría mui bien. Siempre que tengo dalgo de tiempu dedícome a tirar perhí un poco, aparte que disfruto muncho esperimentando en casa. Taría bien mezclar gaita, pandereta, etc. con música lletrónica n’Asturies». Nesi sen, entama actuaciones per Asturies en solitariu nes que garra los cantares orixinales, «métolos nun programa y creo una base musical que me preste y que quede bien cola gaita. Toco lo que xubo al TikTok pero más ampliao y con un bon equipu de soníu. Intento treslladar la esperiencia de ver un videu en TikTok al direuto y a la xente-y presta».
Y como proyeutos a curtiu plazu tien «sacar dalgún proyeutu discográficu cola banda y movela, per España o per fuera de les fronteres. Y a nivel personal, siguiendo un poco la llinia d’Eva y Kike, sacar dalgo asina, pero gaita solista y con ritmos tradicionales asturianos, pero ye complicao y diría pa llargo yá que suelo trabayar lento».Siempre centráu nun instrumentu que, como tien dicho, requier munchu esfuerzu, llabor que paga la pena por momentos como «cuando recuerdo viajes cola Banda Gaites de Corvera tocando la gaita en sitios como en China, na Gran Muria, vistíu d’asturianu; cuando creamos la banda nueva y depués d’una actuación, tomando dalgo, comentamos qué bien salió; o cuando toqué con Enol nel derbi n’El Molinón acompañáu de Rodrigo, que m’enseñó a tocar la gaita, y componentes de la banda de Corvera y del Cabu Peñes y xente d’otres bandes que m’acompañó na mio trayeutoria musical. Indescriptible». Y los que queden llevando los sones d’Asturies a tolos requexos del planeta.
