La entrenadora del Telecable, que cumple la so cuarta temporada al frente del equipu de ḥoquei patinos de La Calzada, disfruta cola ambición de les sos xugadores en pista, un bloque que ta acabante de llevantar la Supercopa, el primer títulu de la temporada; esti sábadu van compartilu cola so afición en Mata-Xove aprovechando’l debú lligueru contra l’Orkla Bigues i Riells
El Telecable Gijón Solimar traxo d’Olot esta fin de selmana pasada’l primer títulu de la temporada, la Supercopa, el vixésimu del so palmarés, al superar al Esneca Fraga (0-0 y 1-0 nos penaltis) y al Vila-Sana Coop. d’Ivars (2-1), los dos meyores equipos actuales del ḥoquei patinos femenín, con permisu del conxuntu xixonés. Una gran allegría pa la so entrenadora, Natasha Lee (Johor Bahru, 1988), depués d’un añu nel que les sos xugadores raspiaron el llevantar una copa. Güei van presentar el troféu a la so afición na visita del Orkla Bigues i Riells a Mata-Xove (19.15 hores) nel debú lligueru, partíu nel que la téunica quier sumar los 3 primeros puntos nesta OK Liga Iberdrola.
La meyor manera d’arrancar la temporada ye con un títulu, ¿non?
Entamar con un títulu ye pa nós un chute d’enerxía. Danos ilusión, ganes y cierta tranquilidá.
¿Qué análisis fai de la Supercopa?
Llegar como llegamos foi duro, porque nosotres nun pudimos entrenar al completo hasta la selmana del tornéu, pero l’equipu caltúvose mui firme y creo que dimos una lleición de cómo trabayar en conxuntu pa superar a dos rivales que l’añu pasáu quitáronnos l’accessu a les copes.
¿Caltener el bloque foi clave pal tornéu d’Olot?
L’equipu nun parte de cero, vien con unes idees trabayaes, y obviamente favoreciónos esa fin de selmana, pero hai que siguir trabayando tolos escenario si queremos siguir ganando títulos.
¿Echa en falta dalgún refuerzu o retoque na plantía?
L’añu pasáu punxi na llista dalguna xugadora que podría danos un plus, sobre manera teniendo en cuenta posibles lesiones, al ser una lliga mui llarga, pero nun pudo ser.
Si la Supercopa tien un nome propiu ye’l de la portera Viki Caretta.
Podemos dicir que la fuercia del grupu y Viki Caretta. Merecíase una Supercopa como ésta.
Güei entama la OK Liga en casa cola afición. ¿Cómo lo afronta?
Queremos que sía un ambiente festivu porque enseñamos la copa a la nuesa afición, pero al empar ponenos el monu de trabayu porque queremos comenzar la temporada con 3 puntos y ser mui fuertes na nuesa casa.
-¿Qué oxetivos se marca esti añu?
El primeru yera ganar la Supercopa y agora que yá la tenemos esperamos tar mui cerca de les finales pa trayer más copes a Xixón.
¿Cómo ve a los rivales?
Yá tuvimos el primer contautu con ellos na Supercopa y tanto Fraga como Vila-sana son dos plantíes que salieron reforciaes esti añu. Individualmente, una a una, pueden igual ser un poquitín superior a nosotres, pero la nuesa fuercia ye’l conxuntu. Va ser duro, obviamente, porque son dos equipos mui fuertes; viose nesta Supercopa y va notase más alantre, pero nun tenemos mieu a naide.
¿Y n’Europa?
Va ser paecío que n’España, pero cola incorporación del Benfica, que tien a Aimée Blackman, xugadora que ta na seleición española. Tenemos munches ganes de ganar la Copa d’Europa.
Dicía enantes de la importacia de facese fuertes en casa. Pa ello xuega un papel importante l’afición, que nunca falla y tuvo presente n’Olot.
Tenemos muncha suerte de que los familiares nos apoyen muncho, viaxen muncho, y en Xixón vemos que cada año nos siguen más. Por exemplu, l’añu pasáu cola Copa de la Reina viose que la xente aficionóse al ḥoquei. Queremos facer una bona campaña pa que vengan a venos y que tean con nosotros porque pue ser una temporada mui guapa.
Ye’l so cuartu añu nel bancu del Telecable. ¿Cómo se siente?
Bien, ye una continuidá, lo que nos permitió tener una identidá, tener un ADN. Cuando salimos a pista nótase, identifícase un equipu ambiciosu. Consiguimos que les xugadores ameyoraran y allégrame siguir aportando a deportistes del nivel de Marta Piquero, que pa min ye la meyor del mundu anguaño, y que sigan deprendiendo.
