L’equipu de roller derby ta en Bergen pa xugar esti sábadu un triangular amistosu con conxuntos del país nórdicu, lo que confirma’l saltu de calidá d’esti equipu; «ye una llocura, porque va menos de 10 años tábemos mirando vídeos n’Instagram de cómo facer les coses y descubriendo esti deporte», recuerden
Dicir roller derby n’Asturies va unos años sonaba estraño pa la mayor parte de la población. Pocos yeren los que conocíen esti deporte y, como muncho, podría sona-yos de velu en dalguna película o serie estauxunidense. Col pasu del tiempu, y gracies al trabayu d’un grupu de moces axuntaes alredor de La Güestia, equipu activista nacíu en Xixón nel 2017 y con sede anguaño en Bimenes, agora son munches más les asturianes y asturianos que saben de la esistencia d’esta modalidá de contautu con patinos. Un crecimientu que foi a la par de la medría de nivel de les sos xugadores, que compiten coles meyores nel Estáu y que salen inclusive a defender los sos colores per Europa. Güei tán en Bergen, población noruega, pa enfrentase nun triangular amistosu col Wet City Rollers llocal y el Nidaros Roller Derby de Trondheim.
«L’añu pasáu yá xugamos en Graz y en Tarbes, n’Austria y Francia», apunta Sara Laína ‘Layna’, que compite baxo’l nomatu de ‘Laynestable’, yá qu’una de les carauterístiques d’esti deporte ye que toles xugadores tengan ún. Ella forma parte del Comité d’Entrenamientos de La Güestia, entidá que s’organiza «de forma horizontal, nun hai direutiva nin entrenadora como tal, sinón que lo facemos en forma de comités, de manera asamblearia», otra de les peculariedaes «del deporte y particularmente del nuesu equipu», y ye una de les 16 desplazaes a Noruega, anque nun va poder patinar por una lesión. «Salimos en busca de choques de nivel pola evolución del equipu», que compite nel Estáu nuna lliga añal que se convoca tolos años con diferentes variaciones y nel que «tamos en Primera con equipos de València o Madrid», esplica, partíos que se busquen per mediación d’un comité de nome Interlliga. Viaxes, toos ellos, autoxesionaos.
Les asturianes partieron el martes vía Bilbao con una espedición formada por 13 xugadores y 3 persones pal bancu. Un desplazamientu llargu nel que, amás de competir y compartir coles rivales, van aprovechar pa conocer Noruega. Una oportunidá que llega gracies a un deporte como’l roller derby, con un importante componente políticu que Layna define como «de contautu en patinos d’equipu femenín, entendiendo que femenín queda un pelín yá desfasao, porque cuenta con persones non binaries». «Nun esiste roller derby ensin la parte activista, ensin la forma d’organizarnos y lo que defendemos», añade.
Lo que ye la competición d’esta modalidá nacida nos Estaos Xuníos «asocede dientro d’una pista elíptica, onde una persona, que ye la ‘jammer’, tien que superar a les cuatro bloquiadores del equipu contrariu». En total, son 10 xugadores en pista, cinco por equipu, con una ‘jammer’ o anotadora por caún, per dos tiempos de 30 minutos «que se dividen en ‘jams’ de 2 minutos. Xuéguense esos 2minutos y sal y entra xente de pista, porque son 2 minutos mui intensos nos que,físicamente, tienes que retener a una persona» al traviés del contautu, un deporte nel que’l llabor arbitral, con cinco xueces al empar, ye perimportante.
La Güestia asentó’l roller derby n’Asturies nel 2017 y, dende entós, nun aparó de medrar. «La lleenda cuenta qu’hai unes personas que vienen de Portugal, onde yátenía más percorríuesti deporte, y empiecen a xugar. Asina, surde un equipu previu que termina fusionándose y a base de redes, amigues, círculos d’activismu políticu, toma forma. Nun entamu entrenábase en Xixón, pero l’ofrecimientu d’un espaciu per parte de Bimenes fixo que se treslladaran al conceyu yerbatu, onde cuenten cola disponibilidá d’un pabellón coles llinies específiques d’esti deporte pintaes. Toa una declaración d’intenciones.
En total agora l’equipu ta compuestu por una trentena de xugadores y pal 22 de payares preparen una xornada de bienvenía pa que nueves persones conozan el deporte. Tamién reciben les llamaes de colexos pa presentar el roller derby, lo que soprende a la reciella: «Qu’haya contautu yá-yos choca un poco, y que sía en patines y de moces, con cuerpos tremendamente diversos yá… Y amás flípa-yos que nun haya pelota; siempre-yos facemos la broma de que la pelota realmente somos nosotres».
Un llabor agora recompensáu cola esperiencia noruega, viaxe totalmente autoxestionáu que ye posible gracies a «entamar eventos, bingos musicales, fiesta de Navidá…», lo que yá ye un arguyu pa elles, al igual que poder enfrentase a equipos del nivel de los dos noruegos. «Ye una llocura que va menos de 10 años tábemos mirando vídeos n’Instagram de cómo facer les coses, tábemos descubriéndolo entrugando a otros equipos y pidiendo a xente que tenía más trayeutoria que nos esplicara cómo se facía esti deporte; de dir a partíos y ablucar colo que nos facíen. Y agora, esto… Que si vamos a Mieres tamién ye increíble, pero poder dir a Noruega pagándonos el viaxes gracies al nivel de disposición y d’esfuerciu per parte de toos… Dir hasta ellí y llevar el nuesu mamarrachéu hasta tan lloñe, ye una llocura» valora Layna. Y lo que-yos queda por venir a esti grupu de moces que nun atopa techu.
