Neñes y neños van poder falar col personaxe navidiegu nes hores previes al entamu de la so llarga travesía dende’l mar de los Sargazos a Asturies; el 24 d’avientu va facer una parada na instalación xixonesa pa recoyer coles sos propies manes les sos cartes

Depués de meses de trabayu nel mar de los Sargazos cuidando a les anguiles, pexe que se reproduz nesti llugar del Océanu Atlánticu, L’Anguleru torna a casa de cara a la Navidá. Ta estos díes preparando L’Angulina, la so barca, cola que va viaxar a Asturies pa pescar angula que vender pa ganar perres coles que comprar regalos a la reciella que reparte en Nuechebona, neñes y neños que van tener la oportunidá esti domingu de falar col personaxe navidiegu gracies a la tradicional videollamada que’l personaxe navidiegu fai colos sos collacios del Bioparc Acuariu de Xixón.
Va ser esti domingu al meudía, cuando alborez nel mar de los Sargazos, cuando va tener llugar el contautu. L’Anguleru va dar detalles de la so llarga travesía de cuatro selmanes y va responder a toles entrugues de los presentes, que van tener la oportunidá d’entregar la so carta nel buzón que los llendadores, los sos ayudantes, encargaos de cuidar los ríos asturianos, van instalar en la entrada del Acuario. L’home de chubasqueru mariellu, gorru de llana y farol va acudir a recoyeles el 24 d’avientu, xornada na que los neños y neñes que s’averen a la instalación van poder entrega-y los sos deseos de manera personal y inmortalizar el momentu con una semeya.



