La Xunta pola Defensa de la Llingua Asturiana (XDLA) entama esti vienres ‘Universu Damián’, actu n’alcordanza del periodista fináu en febreru a los 40 años nel que participa una bona representación de la cultura asturiana tradicional y de la más contemporánea
El nome yá lo diz too: ‘Universu Damián’. El públicu que s’avere esta tarde a la Casa de Cultura d’Avilés (19.30 hores, entrada llibre hasta completar aforu) va atopar nesti actu preparáu con munchu ciñu pola Xunta pola Defensa de la Llingua Asturiana (XDLA) una representación amplia de la música y les espresiones que más-y prestaben a Damián Barreiro, periodista avilesín nacíu n’A Estrada que dexó tocáu al mundu cultural asturiana en febreru cola so perda con tan sólo 40 años. Un homenaxe nel que participen los sos almiraos Rodrigo Cuevas, Beatriz Rodríguez de ‘Grupo Beatriz’, Mariluz Cristóbal col gaiteru Llorián García, Algaire y Fruela 757, una bona representación de la cultura asturiana tradicional y la más contemporánea, y nel que tamién va haber espaciu pa la escenografía y los audiovisuales, y la lliteratura.
L’actriz avilesina Natalia Suárez Ríos va conducir esti aconceyamientu de collacios y collacies pa recordar a Damián, que «yera muncho más qu’un compañeru na XDLA. La so forma d’entender la vida, el so compromisu col país y col idioma, trespasaben con muncho la militancia na organización», apunta el coletivo cívico, que rescampla que «foi precisamente nesa trinchera común onde lu conocimos meyor, onde compartimos trabayu, idees y rises, onde lu quiximos». Resultó especialmente importante pa l’asociación el so trabayu investigador sobre’l papel clave que xueguen les televisiones públiques pa la normalización llingüística. «Nesi campu dionos muncho: conocimientu de lo que se facía n’otros sitios, visión crítica, idees fresques y, sobre too, una capacidá de trabayu fuera de lo normal”, recuerden. Y tamién «humor. Munchu humor d’eso que fai llevaderos los debates y les xornaes llargues».
«Nun colectivu como’l nuestru, que sobrevive namás col trabayu desinteresáu y voluntariu, cola entrega personal, perder a una persona como él dexa un furacu grande. Esti actu fíxose con esi espíritu de trabayu solidariu, con tola xente que lu quería. Nació cola voluntá de recomponese poco a poco, animaos por toles palabres d’afectu y recuerdu de tantes y tantes persones nestes selmanes. ‘Universu Damián’ quier ser una despidida a una persona mui importante pa la XDLA, pero tamién ye una manera de face-y un homenaxe públicu», espresa la organización, qu’anima «a tola xente a que s’allegue a Avilés pa vivir esa tarde una xornada d’amistá y alcordanza».
