«L’Asturies que tien la necesidá de medrar vese superada pol cartón-piedra col que se quier remocicar esta rexón»
Estes últimes selmanes salía espublizada na prensa asturiana una noticia sobre la recuperación de la llínia ferroviaria Coḷḷanzo (conceyu d’Ayer)- Trubia (conceyu d’Uviéu), cuantayá utilizada pa la estaya minera na zona, pero que, pola perda d’esta, fue amenorgando na so actividá. Dende hai yá unos años delles persones, en comuña con ADIF y el Muséu del Ferrocarril, trabayen pola restauración d’esti serviciu, non pa da-y l’usu que tenía —carbón y tresporte de pasaxeros—, sinón para crear una vía turística que puxe pola recuperación económica de la zona.
Los alcaldes de los cinco conceyos interesaos —Mieres, Uviéu, Ayer, Ribera y Morcín— punxeron los finxos pa qu’esti proyectu salga alantre. Mentanto esta idea paez que ta a piques de ver la lluz, otru proyectu que sí ye una realidá nesti territoriu, como ye la FEVE, un verdaderu exe de comunicación, muerre acaldía.
L’Asturies que tien la necesidá de medrar vese superada pol cartón-piedra col que se quier remocicar esta rexón. Ellí onde hubo una actividá, una tradición o un raigañu, surde un recuerdu, un centru d’interpretación de lo que fue esi trabayu y el so correspondiente edificiu enllenu de sales baleres, semeyes peles parés y cuartos onde se proyecten curtios que remembren tiempos meyores. La señaldá forma parte del ser asturiano, un rasgu perimportante del nuesu carácter. Preferimos esmolecer polo pasao en cuenta d’usar esi recuerdu pa construyir sobre pilpayos un futuru qu’apurra trabayu y dignidá a esta tierra. Pero non solo la tristura ye parte de nueso: la desconfianza tamién ye daqué mui asturiano. Veslo agora qu’Amazon aporta a Asturies: una sede onde trabayarán milenta persones y gracies a la que vivirá abonda xente perdayuri fai qu’hasta dalgún diputáu de la Xunta Xeneral glaye escontra lo que considera que van ser «mozos de almacén» (sic). Lo que ye una oportunidá pa que xuxa l’empléu n’Asturies conviértese darréu nuna escusa política.
En tiempos de pandemia y na situación llaboral na que s’atopa’l Principáu esbabayar d’esti mou abúltame impensable. ¿Con qué autoridá puede unu xulgar asina a los sos paisanos, que nagüen por unviar el currículu pa poder trabayar? ¿Quiciabes había qu’edificar un muséu qu’honre lo que fue l’espoxigue económicu d’esti país? Saldría más rentable atropar tolo que mos caracteriza como pueblu —la sidra, la música, la hestoria, la llingua y un llargu etcétera que tamos enfotaos siempre n’escaecer— y arrexuntalo nun muséu que tea asitiáu, por exemplu, na zona centru —cuido que per Llanera—: aforraríamos n’espaciu, personal y tiempu. Sedría un British Museum, pero a lo asturiano. Y naide nun tendría interés en reclamar lo de so porque too sedría fumu, buelgues na memoria.Y el futuru dexaríemoslu pa prau; y nél podríemos semar patates.
Andrés Treceño es médico y colaborador de miGijón
