Llectura y repostería danse la mano esti 23 d’abril, Día del Llibru, gracies a esta propuesta entamada a comuña pola Conseyería de Cultura, Política Llingüística y Deporte, y diferentes sectores, como’l panaderu o l’editorial, pa regalar nesti día un llibru y una rosca, productu qu’en dalgunes confiteríes escosó a primer hora
Confiteríes y pasteleríes de Xixón, Uviéu, Salas, Villaviciosa, La Pola (Ḷḷena), Mieres, Turón, Llastres y Villaviciosa participen nel primer San Xurde, una iniciativa de la Conseyería de Cultura, Política Llingüística y Deporte pa celebrar n’Asturies el Día del Llibru. Ésta consiste en regalar un llibru y una rosca, dulde o salada, fecha de manera específica pa esta xornada con ingredientes de calidá, como miel de la IXP (Indicación Xeográfica Protexida), nestos llocales participantes, que tán recibiendo una gran demanda, como amuesa qu’en dellos llugares s’escosaren a primer hora, como ye’l casu de Xixón.
D’esti mou búscase tamién potenciar la figura de San Xurde, patrón de dellos conceyos y protagonista de lleendes llocales como la del cuélebre de Zalón, n’Ayande, convirtiéndolu asina n’iconu de la fiesta asturiana del llibru’l 23 d’abril, afitando un venceyu ente les obres y la tradición pa facilitar la participación ciudadana al rodiu d’una fecha simbólica nel que’l llibru se convierte na exa vertebradora d’una programación que refuerza la función de les biblioteques como espacios vivos, creativos y participativos. Asina, la rede pública va acoyer más de 150 actividaes en diferentes conceyos con motivu d’esta celebración, que se pueden consultar nesti enllaz, baxo’l lema institucional ‘Una cultura pa la paz’.
Confiteríes
Xixón: Balbona.
Uviéu: Rialto, Auseva, El Bollu, El Calderu y Panadería Casero.
Llastres: La Tahona de Enrique y Alvapan.
Villaviciosa: Colón y La Portalina.
La Pola (Ḷḷena): La Vienesa.
Mieres: La Vienesa.
Turón: La Vienesa.
Salas: Carajitos del Profesor.
Llibreríes
Xixón: Buroteca, La Buena Letra, Personajes, Librería Náutica San Esteban, Serendipia, Roy, La Madriguera, Amez, La Oreja Verde y Acuarel.
Uviéu: Cervantes.
Mieres: Papelinos.
Lluanco: Pi-Pu y Cabo Peñas.
