La xixonesa ta preparada pa completar un bon papel el domingu nel Européu de cross que va tener llugar nel Algarve, onde se marca «facer top 15»; a pocos díes de la cita, repasa pa la estaya ‘Deporte de raigañu’ los sos años de formación y llegada al profesionalismu
A los sos 26 años, Isabel Barreiro García (Xixón, 1999) ye un referente del atletismu xixonés y asturianu. L’atleta profesional va formar parte una vegada más del equipu español de cross, la séptima, que va competir esti domingu nel Européu de Portugal, onde espera facer una bona carrera que-y permita ser convocada pal Mundial que va tener llugar en xineru en Florida. Nesta entrevista pa la estaya ‘Deporte de raigañu’ fala del camín percorríu hasta llegar a la so posición actual nel mundu del atletismu.
¿Cómo entama nel atletismu?
Foi un poco de casualidá, porque la mio familia nun fixera enantes atletismu. Vinieron al colexu, a La Milagrosa, a danos la típica charra p’apuntanos a atletismu. Dixéronnos qu’había que correr, saltar, llanzar, y yo siempre fui una neña mui movida, gustábame dir corriendo a toes partes. Entós, llamóme l’atención y salí del colexu diciendo-y a la mio madre que quería apuntame a atletismu.
¿Qué edá tenía?
6 años. Entamé col Atlético Gijonés Fumeru y tuvi nél hasta los 19 o 20 años.
Nun primer momentu, ¿vas probando toles modalidaes o yá te centres nuna, nel so casu nel fondu?
Al principio facíamos de too. Yo fixi llonxitú, pesu… Non toles pruebes, pero bono, cuasi toes. Y foi a partir de cadete, cuando teníes yá 13 o 14 años, cuando te centres un poco más no que se te da meyor, nel mio casu’l fondu, nel 1.000 y nel 3.000, que yeren les pruebes más llargues qu’había neses categoríes.
¿Cómo influyó nel so desarrollu l’atletismu?
Ye la parte más importante de la mio vida porque al final llevo munchísimos años faciendo atletismu y, pa enriba, dende los 6 hasta los 26 que tengo agora, pases per toles etapes. Primero yes un críu, llueu l’adolescencia, que yo creo que tamién te marca mucho… Llevo tola vida estudiando y entrenando, que yera lo que más me gustaba facer. Y creo que lo más importante, o lo que más destaco, ye la disciplina que te da’l deporte.
Cuando quies facer daqué, sabes que te tienes qu’esforzar. Entós, a min lo que me gustaba yera entrenar, pero sabía que si nun facía la xera, nun me diben a dexar dir. Entós, a la hora d’organizame y pa la vida en xeneral, creo que ye lo que más valoro.
Con 19 años entama yá a competir a un nivel importante, en clubes de fuera, y la so carrera universitaria, Fisioterapia.
Tuvi nel Valencia, nel Bilbao, y agora n’Adidas, pero siempre en Xixón. Lo bono del atletismu ye qu’anque teas nun club de fuera nun tienes que movete de ciudá, y yo siguí entrenado en Xixón. Ye la etapa más complicada pa organizate, porque al final nel colexu sí tienes que estudiar, pero nun ye como dir a la universidá. Les práutiques tamién son munchas hores en pie y demás, pero bono, siempre pudi llevalo bastante bien.
Ta convocada pal Européu de cross cola seleición española que va tener llugar el domingu nel Algarve. ¿Cómo llega a esta cita?
Con munches ganes, sobre manera porque pasé un par d’años un poco más complicaos, con lesiones. La temporada pasada pudi facela por fin entera, que yera un poco lo que pretendía, usala como de transición; poder facer les coses bien, llegar al branu, y yá esti añu entamar con munches más garantíes, ensin tener que parar munches veces poles lesiones. Y sirvióme pa llegar agora a avientu mui fuerte y con aspiraciones de facelo bien nel Européu.
¿Qué meta se marca?
A nivel individual l’oxetivu ye facer top 15, que sería’l mio meyor resultáu nesti campeonatu. Creo que llego lo suficientemente preparada pa facelo.
Depués llega’l Mundial, en Florida.
Sí, ye en xineru. Que me convoquen o non va depender de lo que pueda facer nel Européu. Voi dir con too, porque la idea ye tar nel Mundial tamién.
Volviendo a atrás, a esos 19 años, lleguen ufiertes de clubs, patrocinios… ¿Cómo se recibe?
Nunca me plantegara ser deportista, atleta profesional, porque tampoco tienes la referencia de muncha xente que lo faiga. Yo simplemente entrenaba porque me gustaba y tenía bonos resultaos, pero nunca me plantegué dedicame a ello al cien por cien hasta que yá, nel añu últimu sub-23, di’l pasu. ‘Esti añu acabo la carrera y voi probar a dedicame sólo a entrenar’, pensé, y ehú foi cuando llegó Adidas, lo que realmente permitió que pudiera dedicame a esto.
Ensin esi sofitu, ¿sería imposible?
Agora mesmo si nun tienes el respaldu d’una marca ye mui complicao. Ta tamién la Federación Española, que tien beques, anque ye complicao acceder a elles. Too va sumando, y si tienes marques más la beca… Mientres sías bonu, como se suel dicir, pues vivir d’ello.
Na so carrera tien dellos grandes llogros… ¿Con cuálos se queda?
El que más repercusión tien ye’l de ser campeona d’España de 10.000, pero tamién doi especial importancia el ser cuarta d’Europa sub-23.
A les rapacines y rapacinos que tán agora entamando nel atletismu, ¿qué conseyos-y da?
Sobre manera que se lo pasen bien. A día de güei sigo disfrutando de lo que faigo y ésti ye un deporte que como nun lu disfrutes nun vas llegar a nengún llau. Tienes que deprender un poco a sufrir, porque siempre hai momentos complicaos, pero siempre hai que facer lo que te guste. Y que tengan un plan B, qu’estudien, que vivir d’esto ye mui complicao.
