El deportista de la base del Círculo, debutante col primer equipu con 16 años, afirma percibir una evolución nel so xuegu nos meses que lleva entrenando col primer equipu y suaña con que «haya baloncestu ACB otra vegada en Xixón y yo pueda participar nesi equipu»
Xuega nel ‘junior’ y nel Nacional (Primera FBPA) del Círculo Gijón Noega Baloncesto dende esti branu, pero combina les sos participaciones colos entrenamientos col primer equipu magar tener 16 años. Luis Manuel de la Fuente Redruello (Xixón, 2009), base de 1,93 metros, ye una de les grandes promeses del baloncestu asturianu y el club xixonés tien una gran confianza na so progresión. Nesta entrevista pa la estaya ‘Deporte de raigañu’ cuenta la so esperiencia d’estos meses y la sensación al debutar.
¿Cómo y cuándo entama a prauticar baloncestu?
Nel mio colexu, el Río Piles, alredor de los 6 o 7 años, colos mios collacios al empar que tamién xugaba nel Grupo Covadonga, nel que tuvi xugando hasta esta temporada, 1° ‘junior’, que me fichó’l Círculo.
¿Qué aporta esti deporte a un rapaz como tu?
Pa min el baloncestu ye dalgo mas qu’un simple deporte, ye una forma de vida. Dende bien pequeñu tuvi venceyáu al baloncesto, y ésti proporcionóme amistaes y sentimientos, como debutar y formar parte del club de la to ciudá. Tamién, esti deporte tresmitióme que si lluches por dalgo y de verdá lo quieres, nun ye tan imposible poder algamalo. Entovía hai momentos nos que me pongo a pensar y nun me sé esplicar cómo toi nel equipu del que, repito, tengo ropa de cuando yera pequeñu y pidía semeyes a los xugadores de temporaes pasaes.
¿Cómo recibió la llamada del Círculo?
Nel branu d’este 2025 al traviés d’Efrén, el so direutor de Cantera y entrenador ayudante del primer equipu. Contautáronme pa ufrime un proyeutu que m’ilusionó muncho y decidí dar el pasu de venir al club, asumiendo que diba dexar el llugar onde creciera y desarrollara’l mio xuegu per unos 10 años.
¿Ye difícil adaptase a entrenar nun equipu de Segunda FEB con namás 16 años?
Tengo que reconocer que yo siempre tuvi constancia de la plantía del Circulo. De fechu, de pequeñu diba cuasi tolos sábados a velos xugar. Entós claro, yo tenía una idea d’ellos mui profesional y llonxana, pero tolo contrario… Toi pila contentu y siéntome arropáu dafechu por toos. He dicir que tanto’l club como los compañeros punxeron mui fácil l’adaptación; siempre tuvieron totalmente pendientes de min y atentos a lo que pudiera necesitar. Namái puedo da-yos les gracies a toos porque me lo punxeron mui fácil.
¿Qué-y sorprendió más de los sos compañeros?
Deportivamente, la calidá individual enorme de caún. Veslos xugar y dices ‘qué facil, voi intentalo’, y al final nun ye que l’actividá sía cenciella, sinón qu’ellos faen vela fácil. A nivel personal, son un grupu fantásticu, toos me tratan como un ventiañeru mas (rises). La verdá ye que toi mui conforme col grupu.
¿Cómo vivió’l so debut col primer equipu?
Ye un día que tendré grabáu pa tola vida. Recuerdo la llegada al pabellón. Yo nesi momentu taba tranquilu porque nun contaba con xugar, porque m’incorporara al equipu diba pocu tiempu. Entós nel calentamientu entamo a meteme nel partíu, y de sópitu, asáltame una idea: la dulda de si diba a xugar. Entós principió’l partíu y yo taba muriéndome de les ganes por xugar. Hasta que llegó’l momento; cuando Nacho me miró pa entrar, salí disparáu pa pidir el cambiu (rises). Nun me noté nada nerviosu y disfruté a tope esos primeros minutos. Siempre m’alcordaré de Ponferrada y taré mui agradecíu a Nacho y al Círculo por dame esta oportunidá, que, reconozo, non munchos xugadores cola mio edá pudieron esperimentar.
¿Cree qu’evolocionó nel so xuegu estos meses?
Sí, munchísimo. Siempre tuvi la suerte de tener mui bonos entrenadores que m’ayudaron muncho y a los que taré siempre agradecíu… Pero la oportunidá de tar con un equipu de Segunfa FEB como m’ufrió’l Círculo… Ye otru nivel d’entrenamientos y d’aprendizaxe, mui difícil d’esplicar si nun se vive. En malpenes 3 meses yá voi notando una progresión y evolución mui grande en diferentes facetas del xuegu que, espero, vaya a más nestos meses próximos del 2026.
¿Cómo se define como xugador?
Un xugador d’equipu y mui competitivu. Siempre intentando aportar el mio granín d’arena en toles facetes posibles del xuegu, tanto ofensives como defensives.
Vien de ser importante nes seleiciones asturianes. ¿Qué oxetivos se marca a un futuru próximu?
Afitame nes categoríes ‘junior’ y, sobre manera, en Nacional, y asina tener la oportunidá de poder ayudar al primer equipu cuando pueda sirvir d’ayuda y crean que tea preparáu.
Un suañu.
Deportivu, qu’haya baloncestu ACB otra vegada en Xixón y yo pueda participar nesi equipu.
¿Qué-y diría a los críos qu’entamen nel baloncestu y que querríen tar en dinámica d’un equipu como’l Círculo?
Qu’estudien y disfruten muncho xugando al baloncesu, que’l tiempu pasa voláu. Va nada taba na grada viendo al equipu de la mio ciudá y agora soi ún más de la plantía. Obviamente, entrenando con intensidá y constancia. Si s’organicen y ponen munches ganes, hai tiempu pa too y la recompensa merez tol esfuerzu que supón y más.
