La Xunta pola Defensa de la Llingua Asturiana (XDLA) denuncia «un casu nuevu de discriminación llingüística», nesti casu cola Asociación La Llastra como afeutada, mesmu posicionamientu que caltién Iniciativa pol Asturianu, que reclama al alcalde «una rectificación pública»
«Deberá presentarlo traducido al castellano» ye la respuesta que recibió nuna carta encabezada ‘Requiriendo traducción del documento’, firmada pol alcalde de Colunga, el forista Ángel Toyos, l’Asociación La Llastra a un escritu con ‘Reflexones sobre la futura Ordenanza Municipal de Regulación del Tráficu nel Cascu Hestóricu de Llastres’ por nun tar «en un idioma oficial». D’esta forma esti coleutivu que mira pola cultura asturiana y el mediu ambiente, y, poro, promueve l’usu del asturianu «en toles situaciones, incluyida l’alministrativav, ve refugaes les sos propuestes pa «contribuir a la futura ordenanza de tráficu de Llastres».
Fíxóse ecu d’esta situación la Xunta pola Defensa de la Llingua Asturianu (XDLA), que, nun comunicáu, fala de «un casu nuevu de discriminación pol usu del asturianu». «Esta decisión básase nuna interpretación mui restrictiva de la llei, que garantiza en teoría a la ciudadanía la posibilidá de presentar escritos n’asturianu a les alministraciones», apunta esti coleutivu, que denuncia que «la Llei d’Usu, que munchos defenden como instrumentu abondu pa garantizar l’usu llibre del asturianu, ye na práctica papel moyao. La so aplicación parcial, cuando non restrictiva, dexa a la ciudadanía ensin la posibilidá de dirixise a l’Alministración na so propia llingua».
«Casos como’l que denunciamos güei en Colunga son un exemplu más qu’evidencia la necesidá urxente d’un marcu xurídicu que dea garantía efectiva a los derechos llingüísticos de la ciudadanía. Esiximos un cambiu real, compromisos firmes, más allá de declaraciones, programes electorales y promeses incumplíes», sigue la XDLA, convencida de que «la oficialidá ye la única vía pa que los derechos llingüísticos pasen de les bones intenciones a los fechos». Amás anima a la ciudadanía «a siguir denunciando esti tipu de discriminaciones y a reivindicar el so derechu a vivir n’asturianu».
Pidimientu a Foro pa qu’aclare la so postura en política llingüística
Iniciativa pol Asturianu tamién amosó’l so sofitu a La Llastra y reclamó al alcalde «una rectificación pública». Esta organización caltién que «la Llei d’Usu reconoz el drechu de la ciudadanía a presentar documentación n’asturianu nos usos alministrativos: ‘Tolos ciudadanos tienen derechu a emplegar l’asturianu y a esplicase nelli, de pallabra y per escrito’», apunta la normativa impulsada pol Partido Popular (PP) y el Partíu Asturianista (PAS) nel 1998 con Sergio Marqués al frente del Gobiernu.
El so presidente, Iván Llera, manifesta que «tamos, de nuevu, ante un casu de discriminación llingüística» y reclama a Foro qu’aclare la so postura sobre la política llingüística. «Resulta llamativo qu’un partíu que lleva la oficialidá nel programa electoral y defende la Llei d’Usu seya’l primeru que vulnere los drechos de los asturfalantes onde gobierna», afirma el periodista, que recuerda que «la oficialidá ye la ferramienta constitucional que va garantizar la plena igualdá de drechos n’Asturies independientemente de la llingua que caún quiera escoyer».
