Los alumnos de la especialidá d’Asturianu falen de «discriminación» y «acosu» del equipu docente, mentes que’l decanu de la Facultá de Formación del Profesoráu y Educación niega qu’haya directrices al respeuto y pon como exemplu d’implicación col idioma l’aumentu de places esti cursu
Ye una situación que se vien dando tol cursu, pero en xineru «volvióse insostenible», afirmen. «Dende setiembre les amenaces del profesoráu tán siendo continues: ‘si hacéis los trabajos en asturiano, corréis el riesgo de tener una nota más baja porque no os puedo entender’, ‘si presentáis trabajos en asturiano, es posible que no se os corrijan’, ‘el examen ha de realizarse en castellano’», rellaten nun manifiestu los 9 alumnos de la especialidá d’Asturianu del Máster Universitariu en Formación del Profesoráu d’Educación Secundaria Obligatoria, Bachilleratu y Formación Profesional de la Universidá d’Uviéu —ye’l tope de places ufiertaes pola institución, qu’hasta agora taba en 5 magar la demanda y la falta de profesores d’asturianu—, nel que falen de «discriminación» y «acosu». «Parte del profesoráu qu’emitió estos mensaxes terminó por correxir trabayos que dicía nun entender, polo que les actitúes dexen a les clares que se trata de prexuicios escontra l’idioma, non d’una incapacidá por entendelu», entienden.
Estos universitarios señalen a la Coordinación del Máster. «Dióse-y al profesoráu la directriz de que nun s’almitiere nengún trabayu fechu n’asturianu ‘por ser el español la lengua vehicular de la titulación’, incluso a aquellos y aquelles profesores que tuvieren competencies y capacidaes pa poder correxir nesta llingua, dalgo que demostraren con correiciones a trabayos y esámenes n’asturianu previes a esti requerimientu», aseguren.
Un casu concretu ye’l que fixo españar la situación. Depués de la entrega d’un trabayu en plazu y forma, «nun recibimos les calificaciones cuando’l restu de compañeres y compañeros del máster, sinón que dalgunes docentes decidieron poner un asteriscu nel sitiu de la calificación. Cuando nos interesamos pola ausencia d’una nota, recibimos correos que nun respondíen a la consulta o, directamente, nun nos dieron rempuesta dala». La situación llevó a la convocatoria por parte del decanu de la Facultá de Formación del Profesoráu y Educación, Celestino Rodríguez Pérez, de un conceyu nel aula de Convivencia ente los alumnos y les dos coordinadores del máster, Susana Molina y Ellián Tuero.
La versión de los estudiantes ye que, llueu d’esplicar «que tanto normatives llegales estatales como autonómiques y los propios estatutos de la Universidá dan el drechu a facer usu del asturianu en cualesquier aspectu de la vida académica», el decanu señaló que dichos estatutos nun teníen realmente validez, sinón la memoria del máster, que determinaría l’idioma que se podía usar. Tamién, apunten, «llegó a dicir que si siguíemos cola mesma actitú, pal siguiente añu podíen desaparecer places de la especialidá».
Amás, «va dos selmanes recibimos otru corréu onde una profesora, cito testualmente, ‘se veía en la obligación de solicitarnos la repetición del trabajo correspondiente a los temas 4/5 porque, siguiendo las directrices de la coordinación del Máster, todas las pruebas deben presentarse en el idioma de verificación del título’». «Consideramos qu’esti tratu ye intolerable y qu’hai que poner puntu final a les situaciones de discriminación provocaes toos estos meses. Amás, consideramos que lo esperable ye que se cree una normativa específica que blinde’l drechu de tol alumnáu a entregar cualesquier trabayu académicu n’asturianu como yá se fizo colos TFGs, los TFMs y les tesis cuando se trató d’impedir el so usu na redacción de los mesmos», conclúin.
Tanto n’asignatures comunes como n’específiques
Marina García Rodríguez exerció na tarde d’ayeri de vocera de los alumnos nuna concentración na que tuvo representación Iniciativa pol Asturianu y na que se pudo ver a Noelia Ordieres, responsable de Política Llingüística d’Izquierda Xunida (IX). La estudiante esplicó qu’esta situación se da nes asignatures del máster que son comunes a toles especialidaes, pero tamién en dalgunes específiques, como Complementos de la Formación Disciplinar, y considera que vien provocada «por prexuicios lingüísticos, por inferiorizar la lengua asturiana, lo que camuflen con ciertas normatives que nun son asina y que van escontra de nuestros derechos lingüísticos, del Estatutu d’Autonomía y de la Lei d’Usu, amás de los propios reglamentos de la Universidá d’Uviéu». D’igual forma, aseguró que «la coordinación del máster dio la directriz al personal docente de que nun corrixan nengún trabayu n’asturianu, a pesar de que determinaos profesores demostraran competencies y voluntá de facelo. Yá nun sólo atenta contra los nuesos derechos llingüísticos, sinón que tamién viola la llibertá de cátedra de los propios profesores».
Iniciativa pol Asturianu sofita la postura de los alumnos y reclama «una postura contundente del rector Ignacio Villaverde d’alcuerdu colo que recueye l’ordenamientu internu de la institución universitaria». Considera que la «Universidá d’Uviéu nun puede amparar más discriminaciones llingüístiques» y, consultada por miGijón, apunta que la problemática que se ta viviendo esti cursu diose nel pasáu, pero que les reclamaciones feches nel so momentu fixeron que s’iguara una situación qu’agora se repite.
«Son 5 las plazas asignadas y hay 9 alumnos»
El decano Rodríguez Pérez, en declaraciones a esti mediu nuna conversación en castellanu, aseguró que «la sensibilidad de la facultad y de la universidad hacia el asturiano está absolutamente demostrado. Somos sensibles al asturiano, trabajamos por él y tenemos muchos años y una larga trayectoria de su defensa en la docencia, y esta sensibilidad está por encima de todo. Eso no se puede poner en duda y creo que hablar de acoso en los momentos en los que estamos es un poco inadecuado».
Niega l’acusación de la esistencia d’indicaciones pa torgar la presentación de trabayos en llingua asturiana. «Académicamente está mui claro. No hay ninguna directriz para ir en contra del asturiano», asegura al tiempu que señala desconocer les causes de les situaciones que denuncien los alumnos: “no son razones académicas, pero tampoco sé qué razones son. Las académicas están claras y se cumplen cien por cien».
Sobre la postura del decanu na xunta del 14 de xineru, Rodríguez Pérez apuntó que «la memoria no sólo de este máster, sino de todos los grados y títulos de esta universidad, son la base principal del desarrollo de los estudios y exigen una de una acreditación nacional. Además con un máster profesionalizante tenemos que ser muy cuidadoso con la acreditación de los títulos, porque estamos acreditando profesionales habilitados para la enseñanza, entonces la memoria de los títulos y los decretos de enseñanzas mínimas son muy importantes. Es lo que puedo decir; no voy a entrar en debates concretos».
Por último, entrugáu poles supuestes amenaces denunciaes polos estudiantes de reducir les places de la especialidá de Llingua Asturiana del Máster del Profesoráu centróse en comentar «que son 5 las asignadas y este año son 9 alumnos. No era ninguna amenaza, sólo una manera de ejemplificar la implicación de la facultad con el asturiano».
