L’equipu xixonés compite dende esta temporada na categoría máxima d’esti deporte, desendolcando hasta la fecha un bon papel; «queremos tener los pies na tierra, faciendo un proyeutu estable nel tiempu, con filosofía de cantera», apunta’l so presidente David Gómez Casanovas
El bádminton ye un deporte d’importante crecimientu n’Asturies. Con ésitos recientes a nivel de clubes firmaos pol Club Báminton Oviedo, esta temporada’l Club Bádminton Astures incorporóse al grupu de los meyores col ascensu a la máxima categoría, la División d’Honor, onde ta compitiendo a un bon nivel. L’equipu xixonés fundáu nel 2007 algamó la so primer victoria na xornada última, contra San Fernando Valencia (2-5), que lu asitien depués de 3 partíos como cuartu del grupu A, de 5 equipos, a la espera de recibir el 10 de xineru al andaluz Recreativo IES La Orden, líder y actual campeón, en La Teyerona. «Queremos tener los pies na tierra, faciendo un proyeutu estable nel tiempu, con filosofía de cantera», apunta’l so presidente David Gómez Casanovas, ún de les persones que s’encargó de poner en marcha esti proyetu va agora 18 años.
«Del 2007 al 2014 foron años de consolidación del club», recuerda’l so dirixente, que señala como motivos fundacionales «el crear cantera, crear base y facer promoción del bádminton; que la xente faiga deporte, lo pase bien, socialice. Y d’ehí p’arriba; el que quiera competir, compite, y el que non, non, apoyándolos hasta onde nós téunicamente podamos ayudalos». Nesos primeros momentos l’Astures llegó a tener «400 xugadores porque tábemos en 22 poblaciones d’Asturies», cifra que se reduz agora a un centenar «al tar agora focalizaos en Xixón».
Asina, «nel 2014 decidimos dar el saltu y crear un equipu de Lliga. Competimos en Coruña y consiguimos l’ascensu a lo que yera daquella Primera División. Dende entós y hasta va dos años, que xubimos a División Oru, anduvimos ente esa categoría y lo que ye agora Plata. Hasta esti añu, qu yá algamamos la Divisón d’Honor». «Tamos nun grupu mui difícil», apunta Gómez Casanovas, cola vista puesta nel tercer puestu que da la permanencia al evitar la promoción, llucha a la que se presenta «con 6 asturianos y 6 de fuera». D’ellos 3 son canteranos del Astures, una cantidá que’l club espera aumentar nun futuru gracies al trabayu que ta desenvolviendo cola base.
«Facemos promoción nes escueles, llevamos folletos, ponemos cartelos, y convidamos a toos a dir a La Teyerona a entrenar», onde l’Astures cuenta con unes instalaciones afayadices pa la práutica del bádminton y onde entrenen los sos 100 miembros a les indicaciones de 5 téunicos. «Trabayamos con neños y neñes pa que lo faigan meyor posible dientro de les sos capacidaes. Que tenemos campeones d’España, como yá tuvimos, fantástico; que tenemos quintos d’España, tamién bien», espresa Gómez Casanovas, qu’amuesa la so felicidá por un 2025 nel que, amás de l’ascensu a División d’Honor, «dellos entrenadores de les escueles formáronse yá a nivel nacional, esto ye, tienen el nivel 1, y eso nótase». Asina, ponse como oxetivu cola base, «a mediu plazu, el volver a tener campeones d’España».
Magar tener les llistes práuticamente completes, l’Astures encamienta a tola xente interesada en prauticar bádminton a ponese en contauto con ellos per redes sociales, más cuando pronto el pabellón d’El Llano-Contrueces va incorporar una estructura nueva pa esti deporte. «Va permitinos crecer y dar cobertoria a toos esos neños que nos llamen y nun podemos meter agora», celebra’l presidente d’esti club que pon a Xixón nel mapa d’esti deporte.
