«Equí fórmense persones enantes que deportistes», valora’l so presidente, Daniel Fernández, que destaca que «valores como’l compromisu, l’esfuerzu, la disciplina, el respetu y el trabayu n’equipu tán presentes en cada entrenamientu y cada competición»
El Club Balonmano Gijón ye ún de los clubes xixoneses que pue presumir de saber lo que ye xugar na categoría máxima. Esta entidá femenina fundada nel 1985 consiguiólo nel 2004, calteniéndose na élite delles temporaes, pero’l so presidente Daniel Fernández tienlo claro: «Más allá de los resultaos sobre la pista, el verdaderu motor que guió al club dende los sos oríxenes foi la so filosofía. El Balonmano Gijón entiende’l deporte como una ferramienta formativa: equí fórmense persones enantes que deportistes. Valores como’l compromisu, l’esfuerzu, la disciplina, el respetu y el trabayu n’equipu tán presentes en cada entrenamientu y cada competición».
Col primer conxuntu compitiendo agora en División d’Honor Plata, la tercer categoría, onde ocupa la sesta plaza, refierse a la cantera como un pegollu fundamental del club, con 250 deportistes distribuyíes nuna ventena d’equipos. «La coordinación ente entrenadores, la progresión coherente ente categoríes y l’acompañamientu cercanu a xugadores y families faen del club un entornu seguru y educativo nel que cada neñu y neña pue crecer al so ritmu. Amás, el Balonmano Gijón foi históricamente un impulsor del balonmanu femenín, apostando pola igualdá y ufriendo oportunidaes reales de desarrollu», apunta’l dirixente. Una apuesta pola base que se ve reflexada tamién en participaciones en fases finales de campeonatos d’España en diferentes categoríes.
Otru elementu clave pa entender la dimensión del Balonmano Gijón ye la so masa social. El club cuenta con alrededor de 386 socios y más de mediu centenar d’abonaos. Amás, les families de les moces suponen un gran sofitu a una entidá que cuenta con un importante númberu de voluntarios y personal téunicu, «conformando una comunidá activa que tresciende lo deportivo». «Esta estructura convierte al Balonmano Gijón nuna de las entidaes con mayor presencia t influencia dientro del balonmanu base asturianu», destaca Fernández.
La llingua asturiana «ocupa tamién un llugar especial» dientro del Balonmano Gijón, asegura’l presidente. Tien presencia «nes graes, nos entrenamientos y na convivencia diaria», apunta, amás de «en campañes y espublizaciones que ponen en valor la cultura llocal, ayudando a reforzar el venceyu ente’l club y la comunidá xixonesa». Un compromisu pa colo propio que ye una amuesa más de los valores d’una entidá que va siguir trabayando en «consolidar y fortalecer la cantera, asegurar un crecimientu sosteníu del equipu senior, impulsar la igualdá y la visibilidá del balonmanu femenín, y reforzar el so venceyu cola comunidá». Otros oxetivos son «modernizar la so estructura, ameyorar la xestión, la comunicación y la formación d’entrenadores, al tiempu que cuidar el bienestar de tolos sos integrantes», pa «caltener al club como un referente deportivo, educativu y social en Xixón». Y, anuncien, «les puertes tán abiertes pa toos los que quieran participar» d’ello, poniendo a disposición de moces, entrenadores y aficionaos les sos redes sociales, web y corréu electrónicu.
