Esti club históricu del voleibol xixonés, que llegó a participar en competición europea, trabaya anguaño pa llevar a los más alto al so senior masculín y femenín; «pa nós ye importante formar xugadores pa que lleguen al primer equipu», apunta Manuel González, presidente d’una entidá con 300 deportistes na base
65 años d’historia tán tres el Club Deportivo CID Jovellanos, entidá fundada nel 1960 nel Real Instituto Jovellanos baxo’l nome de Club Voleibol Jovellanos que, nel 2002, fusionóse col equipu de fútbol CID Nuevo Gijón, adoptando la denominación actual. Por cuestiones de patrociniu llevó’l nome d’Esmena dellos años, nos que vivió una época na máxima categoría, llegando a clasificase a competición europea, con aquel recordáu partíu nel Palaciu de la CEV Cup na temporada 92-93 contra l’alemán Friedrichshafen. Güei, l’equipu compite na Superliga 2 y tien l’ambición de mirar p’arriba y «en 2 o 3 años tar lluchando pol ascensu», esplica Manuel González, presidente.
«Yá nos escaecemos de la pallabra descensu, nos dos últimos años salvámonos bien, y agora queremos tar na parte alta», añade’l tamién entrenador del equipu, que se muestra optimista del futuru próximu “si siguimos igual y contamos con un poco más d’ayuda». Nesi camín, González tien claro que’l pesu de la cantera ye fundamental: «Nes categoríes inferiores tenemos una idea clara, que ye la formación como xugadores pal futuru. Formar xugadores pa que lleguen al primer equipu, que llueu se vea reforzáu con fichaxes que nos permita llegar a mayores oxetivos». «Ye un trabayu pa que nel futuru tengan un meyor rendimientu. Cuando salimos a la pista salimos a ganar, pero si tengo qu’escoyer quedar campeón d’España infantil y llueu nun tener nengún xugador d’ehí pal primer equipu a cambiu de nun quedar campeón y que xuban 3, prefieron que xuban 3», esplica.
El voleibol masculín n’Asturies vivió, al igual que n’España, una mengua importante nos tiempos últimos. «En moces siempre hebo muncha cantidá, anque agora ta notándose un baxón de calidá, mientres qu’en mozos hebo una baxada tremenda de 6 o 7 años. De 30 a 23 o 24 años perdiéronse un montón de xugadores, pero a partir del COVID volvió a haber otru boom y entama a haber cantidá», rellata. Asina, agora el CID Jovellanos cuenta con «300 xugadores, ente mozos y moces” qu’entrenen y compiten nel IES Llaboral a los mandos de 25 téunicos, «a los qu’hai que sumar los que trabayamos con ellos nes escueles deportives, más de 150».
Cifres importantes sobre les que construyir un futuru que mira pa Superliga pa los homes y pa Superliga 2 «en tres años» pa les muyeres, agora en Segunda División, categoría autonómica. «En moces tenemos el plan mui marcáu y esperamos aprovechar la esperiencia que tenemos colos mozos y axilizar el procesu», apunta González. Unos 300 abonaos y 100 socios acompañen al CID Jovellanos anguaño nesti camín pa ver el meyor voleibol en el pabellón de L’Arena.
