Los neños y neñes de quintu de Primaria del CP Los Pericones recaudaron 400 euros pal so viaxe d’estudios cola venta de sidra del duernu y castañes asaes nesta folixa animada pola música de les Pandereteres de Ciares y Rollu Folk
A les 21 hores yá nun quedaba res. Los 30 quilos de castañes y los 60 llitros sidra de duernu que traxeron los neños y neñes de quintu de Primaria del CP Los Pericones pal magüestu entamáu por Esto Ye Ciares nel campu La Cruz en collaboración col UC Ceares, con entamu a les 18.30 hores, duraron poques hores, anque la folixa aguantó hasta les 23. Munchos foron los vecinos, magar el fríu y l’amenaza de lluvia, que s’acercaron pa disfrutar d’esta folixa tradicional de la seronda asturiana.
La música punxéronla Pandereteres de Ciares y Rollu Folk, animando al baille qu’ayudaba a entrar en calor a los presentes. La primera formación aprovechó l’actu pa entregar la distinción de ‘Pandereteru d’Honor’ al UC Ceares ente los aplausos del públicu, qu’enllenó l’altu xunto a la cantina del campu. La recaudación final cola venta de sidra dulce y castañes foi de 400 euros, que los escolinos y escolines van destinar al so viaxe d’estudios.
