Los clubes de fútbol de Xixón y Lleón volvieron a felicitar un añu más a los sos siguidores con mensaxes n’asturlleonés coincidiendo col 21 de febreru, xornada na que se conmemora’l Día Internacional de la Llingua Materna; el Círculo Noega de baloncesto tamién asoleyó esti sábadu una entrada con referencia a esta fecha
Un añu más el Sporting y la Cultural fixeron una referencia en redes coincidiendo col 21 de febreru, declaráu nel 1999 Día Internacional de la Llingua Materna pola Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) pa promover la diversidad llingüística y cultural y el multillingüismu. Una xestu na defensa del patrimoniu llingüísticu d’Asturies y Lleón que foi aplaudíu polos más de los sos siguidores.
El club roxiblancu, qu’en dalgunes ocasiones emplega l’asturianu nes sos redes sociales, asoleyó avanzada la tarde’l mensaxe «Güei y siempres, Real Sporting de Xixón», xunto cola etiqueta #DíaDeLaLlinguaMaterna. Acompañándola, una semeya de los xugadores mientres suena l’himnu nel que se ve a l’afición faciendo’l tradicional bufandéu, rescamplando una bandera conxunta del Sporting y d’Asturies.
Más madrugadora foi la Cultu, equipu que lidera la tabla del grupu 1 de Primera RFEF col suañu tornar a Segunda pela vía rápida, que se dirixía a los sos siguidores con un «¡Feliz #DíaDeLaLlinguaMaterna!» y un testu na variante lleonesa del idioma xunto con una imaxe de siguidores con banderes de Lleón: «Un añu más queremos celebrare cun vosoutros el Día Internacional de la Llingua Materna. Güei ye un día de reconocencia d’aqueillos que protexen y fomentan tolas llinguas faladas nel mundu, especialmente a los que lluitan pola llingua de nuesu, patrimoñu llingüísticu de tolos llioneses».
Otru deporte como’l baloncestu tamién tuvo recuerdu pa esta xornada. Trátase del Círculo Gijón Noega Baloncesto, club qu’emplega davezu l’asturianu nes sos redes y comunicaciones y qu’anuncia güei’l so partíu de Lliga col Recoletas Salud Carbajaosa nel so exiliu forzáu a Uviéu (19 hores, polideportivu de Pumarín) pola celebración nel Palaciu de Deportes del Gijón Premier Padel nesti idioma xunto con un cartelu tamién en llingua asturiana y la etiqueta #XuntosSomosMás y #DíaDeLaLlinguaMaterna.
