Nel so entamu, a lo primero del sieglu, el club buscaba garantizar «el derechu de xugar» de les moces; una vez yá superada esta etapa gracies a la progresión que vivió’l fútbol femenín nos años últimos, la entidá trabaya agora con una estructura de base más axustada pa «xubir la calidá» de les sos futbolistes
La evolución del fútbol femenín ta siendo espectacular nos años últimos: grandes aforos en partíos de clubes y seleiciones, mayor presencia mediática y, sobre manera, como consecuencia de tou ello, más neñes práuticando esti deporte. Una progresión que se pue ver nun análisis a la propia trayeutoria del Gijón Fútbol Femenino, un club fundáu nel 2000 por futbolistes que formaben parte del Escuela de Fútbol de Mareo —el Sporting naquel tiempu nun dexaba a esta seición emplegar el nome de la entidá— y que salieron dao’l pocu sofitu col que contaben dientro de la estructura roxiblanca.
Un primer añu na Lliga autonómica nel que les sos futbolistes yeren mui superiores a les rivales permitió’l primer ascensu y, con él, la creación del filial, entamando una estructura de base que foi medrando poco a poco. Yá en competiciones estatales, el Gijón Fútbol Femenino foi creciendo hasta algamar l’ascensu a Primera, naquel momentu categoria llamada Superliga, nel 2005, aventura que duró un añu frente a rivales como «el Barcelona, el Athletic, el Rayo, el Levante…, equipos que yá daquella apostaben pol fútbol femenín», esplica Xosé Fernández Estrada, secretariu del club.
Los primeros pasos taben daos y club, agora en Tercera RFEF, la cuarta categoría del fútbol estatal, col oxetivu del ascensu —ocupa la segunda plaza empatáu a puntos col líder, el Oviedo B—, siguió compitiendo y fomentando’l deporte dende la base. «A partir de 2015, añu del alcuerdu col Ciares col que se crea la Escuela Mesta de Fútbol, ye cuando hai más boom. Pásase d’un B y un alevín con poques xugadores, a contar con dos alevines, dos infantiles, dos rexonales más l’A; un primer equipu de fútbo sala más el B, un cadete… Crecióse munchísimo de 2015 a 2022», rellata Estrada.
Ye nesti momentu cuando’l club decide dar un cambiu de rumbu. «El derechu a prauticar el fútbol d’esa primer etapa yá se consiguiera. Cualquiera que quiera xugar, pue xugar», polo que «dende 2022 lo que tamos faciendo ye intentar ameyorar en calidá y tener una estructura de cara a sacar xugadores pal A lo más eficaz y lo más eficiente posible. A veces eso pue llegar a implicar axuste de númberos d’equipos. Nun entamu intentábamos crecer lo máximo posible y dende va unos años queremos crecer lo xusto. Inclusive reducise un poco pa también fortalecer a otros clubes, porque al final también tienes que tener contra quién xugar. Nun se trata de tener tú toles xugadores».
Más del 50 % de los téunicos son moces
Anguaño’l Gijón cuenta, en campu, «con un B que vien a ser un xuvenil, un C que vien a ser un cadete, dos infantiles, dos alevines, dos benxamines y un prebenxamín», a los qu’hai que sumar los equipos de sala. En total, más de 200 xugadores baxo los mandos de cuerpos téunicos formaos na so mayoría por moces. «Más del 50 % son muyeres, lo que ye mui difícil entovía nestos tiempos», apunta Estrada. Los campos de fútbol de la Federación, en Roces, son les instalaciones emplegaes pa entrenar y xugar, anque’l primer equipu disputa los sos alcuentros en el campu La Cruz, que comparte col UC Ceares. Mentes, los de sala prepárense nel Campoamor y compiten principalmente en La Teyerona, anque de xemes en cuando tienen que buscar abellugu n’otros pabellones de la ciudá.
«L’oxetivu d’esta nueva etapa ye ameyorar la calidá formativa, ameyorar la cultura deportiva d’esfuerzu y de compromisu dientro del fútbol femenín cola fin de xubir la calidá», destaca’l secretariu del club. Too ello sofitáu en «dos pegollos: formar bones persones y futbolistes cola mayor mentalidá de deportista en cuanto a esixencia». Y, de forma paralela, «retener n’edaes que son mui complicaes y nel qu’hai munchu abandonu deportivu, a les moces prauticando deporte, hasta llegar a la edá adulta. Hai una edá, ente los 13 y los 18, mui crítica onde hai munchísimu abandonu, tamién nos mozos, pero elles muncho más».
El pasu final d’esti procesu ye formar xugadores pal A col oxetivu de ser «el primer equipu a nivel territorial, lo que consiguimos bien l’añu pasáu y tamos intentándolo otra vez nésti, pero idealmente ye tar xugando en categoríes supraautonómiques, esto ye, xubir a Segunda RFEF y asentanos ehí. El club tien un enfoque de rendimientu. Lo de xugar pa divertise, obviamente, ye un componente qu’esiste na base, pero’l primer equipu quier competir y tar arriba». La so importante masa social, compartida col UC Ceares, Balonmano Gijón, Veriña y Manuel Rubio, compruébalo domingu a domingu.
Con estos clubes, amás, comparte un importante compromisu pa cola llingua asturiana, que se ve reflexado nel so usu en cartelería y redes sociales. «Dende va 10 años les mayoría de les comunicaciones son billingües, anque pue haber dalgunes que son namás n’asturianu y otres namás en castellanu», apunta Estrada. Detalles que faen del Gijón Fútbol Femenino una entidá diferente.
