La Xunión Europea (XE) sofita con una aportación del 100 % esta iniciativa promovida pola Fundación Asturies XXI, el Conceyu, la Cámara de Gijón y la Fundación Caja Rural de Gijón pa «revalorizar la cultura de la sidra y l’agricultura tradicional como motor d’identidá, sostenibilidá y cohesión social»
‘Citizens united for Intangible heritage of apple and ciDEr cultuRe in Europe’, o lo que ye lo mesmo, ‘ciudadanos xuníos pola herencia de cultura de la mazana y la sidra n’Europa’, ye’l nome completu de CIDEREU, proyeutu de Cider Cities pa desenvolver y impulsar esta Rede Europea de Ciudaes de la Sidra y la Mazana. La iniciativa de la Fundación Asturies XXI, el Conceyu, la Cámara de Gijón y la Fundación Caja Rural de Gijón pa «revalorizar la cultura de la sidra y l’agricultura tradicional como motor d’identidá, sostenibilidá y cohesión social», apunten dende l’Ayuntamientu, ta teniendo una gran acoyida, hasta’l punto de recibir una financiación del 100 % de la Xunión Europea (XE) pal proyeutu CIDEREU, un montante superior a los 250.000 euros.
Esta bona noticia anuncióse ayeri nun actu celebráu nel Llagar Piñera que contó cola presencia de Jorge González-Palacios, conceyal de Rellaciones Institucionales y Mocedá, y Jesús Martínez Salvador, d’Urbanismu, amás de Marcos Abel Fernández, presidente de la Fundación Asturies XXI; Álvaro Alonso Ordaz, secretariu xeneral de la Cámara de Comercio de Gijón; y José Ramón Fiaño, presidente de la Caja Rural de Gijón. Tamién acudieron representantes de Nava, Cangues d’Onís, Villaviciosa y Chelčicko-Lhenický (República Checa). Completen la rede Cider Cities les poblaciones de Kuartango (Euskadi), Valleseco (Canarias), Sèn Marsì (Italia), Urruña (Francia), Carrazeda de Ansiães (Portugal) y Celje (Eslovenia), representada pola organización Zavod Jnana Bhakti Prada Trust.
Les rellaciones ente estos llugares tienen el so orixe nos intercambios y alcuentros ente estos territorios territorios sidreros desendolcaos nes diferentes ediciones del Salón Internacional de les Sidres de Gala qu’entama añalmente la Fundación Asturies XXI. L’añu pasáu roblóse nel Salón de Receiciones de la Casa Conceyu per parte de les diferentes autoridaes municipales la incorporación a la rede, llista a la que se xunió recién Villaviciosa.
Ente les aiciones previstes nel marcu del proyeutu CIDEREU rescampla una serie d’alcuentros internacionales, esposiciones, talleres y actividaes educatives nes ciudaes participantes nel 2026 y 2027, con trés grandes eventos en Xixón, Italia y República Checa. Tamién se promoverá’l crecimientu de la rede cola incorporación de ciudades nueves a la rede pa garantizar la so continuidá y espansión.
