La Plaza Mayor contó con una gran asistencia pal conciertu de Fillas de Cassandra qu’inauguró la décima edición del festival el martes y que viene programando conciertos, demostraciones de creación artesana, xuegos tradicionales o prebes gastronómiques; esti xueves recibe a Alienda
Portugal, Galicia, Francia… Son dalgunos de los territorios que tán compartiendo estos díes en Xixón la so cultura cola de nueso nuna edición más, la décima, del Festival Arcu Atlánticu, una propuesta recuperada l’añu pasáu que, una vegada más, recibe la validación del públicu, como se pudo ver el martes nel conciertu inaugural de les gallegues Fillas de Cassandra, que práuticamente enllenaron la Plaza Mayor con su propuesta qu’amiesta electrónica y música tradicional y una gran puesta n’escena. Una respuesta que, a menor escala, ta repitiéndose nel restu d’actividaes programaes el martes y ayeri d’un certame que va siguir hasta’l domingu en diferentes puntos de la ciudá.
Ún de los más visitaos ye’l Mercáu Portugués de Campu Valdés, abiertu dende’l vienres, que presenta diferentes puestos con gastronomía del país ibéricu. Alredor d’él, en Cimavilla, tienen llugar la mayor parte de los eventos del Arcu Atlánticu, con sedes tamién nel Antiguu Institutu, la Escuela de Comerciu y el Muséu del Pueblu d’Asturies. Conciertos, como los de José Manuel Tejedor o los bretones Skolvan, visites teatralizaes, promoción turística de Le Mans na Xardinos de la Reina, prebes de sidra de diferentes países atlánticos o proyeiciones son dalgunos de los eventos que tuvieron llugar estos dos primeros díes del festival.
Güei, nos Xardinos de la Reina, amás del puestu de Le Mans, van siguir les demostraciones d’oficios artesanos asturianos de 11 a 14 hores. Cerca, na plaza’l Marqués, va haber una sesión nueva de xuegos tradicionales, de 12 a 14 hores, mientres que na plaza Xovellanos va entamar a les 18 hores la visita guiada teatralizada ‘Fragmentos del tiempo’ en compañía de Xosefa Xovellanos. Mentes, la mirandesa Maria Teresa Almeida va participar nos X Alcuentros Poéticos Letriberia a les 18.30 hores nel Antiguu Institutu en compañía de Roberto González-Quevedo, una gran oportunidá pa sentir poesía nesti idioma del tueru asturlleonés.
La banda Entós va tocar a les 19 hores nel Campu les Monxes o plaza’l Llavaderu, y Alienda, tamién grupu folk, a les 20.30 hores nel Antiguu Institutu. Na xornada tamién va haber una preba de vinos atlánticos (18.30 hores) y otra de quesos y cerveces (20.30 hores) nos Xardinos de la Reina, y va siguir el II Festival Arcu Atlánticu de Cine dende les 19 hores na Escuela de Comercio.
Pa mañana tán programaes les actuaciones de Pandereteros d’Anguaño (19 hores, plaza Xovellanos) y les representaciones de ‘El chigre menguante’ (20 hores, Antiguu Institutu) o la danza vertical de la compañía vasca La Glo Zirkodantza, que presenta ‘Sacred’ a les 23 hores na Torre del Reló, amás d’un alcuentru coral a les 19 hores na Colexata San Xuan Bautista que va tener una segunda sesión el domingu. El sábadu rescampla la pieza teatral ‘Al rodiu l’horru’ d’É Vero Teatro (13 hores, plaza’l Marqués) y les actuaciones de Ferla Megía (19 hores, Campu les Monxes) y Héctor Braga (20.30 hores, Antiguu Institutu), mentes que na xornada final el públicu va poder disfrutar del desfile del Día d’Asturies y la xira en L’Atalaya. Pue consultar el programa completu del Arcu Atlánticu nesti enllaz.
