Un grupu de xugadores del Cimadevilla CF sacó una pancarta n’alcordanza d’Edu Cordero ‘Kily’ al prau d’El Molinón nos momentos previos del Sporting-Elche del sábadu col lema ‘Siempre nel nuestru corazón’
Foi’l 5 de xineru, viéspora de Reis, cuando una llarga enfermedá arrampuñaba al fútbol xixonés y asturianu la figura d’Eduardo Cordero ‘Kily’. Presidente d’honor y delegáu del Cimadevilla Club de Fútbol, del qu’impulsó la so refundación, amás de reconocíu siguidor del UC Ceares, dexaba un importante llegáu que-y permitió ganar el ciñu del mundu de la pelota.
Asina, dende esi murniu día vinieron repitiéndose los homenaxes a la so persona. El domingu pasáu foi en La Cruz, al entamu del partíu qu’enfrentaba al club del barriu xixonés col Caudal, cuando neños del Cimadevilla saltaron al prau pa participar nel minutu de silenciu entamáu pola entidá teyera, con aficionaos amosando una pancarta n’alcordanza nel fondu, y esti sábadu foi na so otra casa, n’El Molinón.
Nos momentos previos del choque ente Sporting y Elche, que finó con empate a un gol, xugadores del club del barriu altu pisaron el verde del centenariu campu con una tela col lema ‘Siempre nel nuestru corazón’, asitiándose frente al bancu llocal y arrancando l’aplausu de la grada. Debaxo, en pequeño, ‘Edu-Kily 1972-2025’. Nos sos partíos de competición, los equipos del equipu qu’ayudó a refundar y del que taba preparando, xunto con Frichu Yustas, un llibru sobre la so historia, yá mostraren previamente camisetes col testu ‘Edu Kily. Cimavilla yes tu’.
