L’equipu asturianu con más títulos, ente ellos una Intercontinental y seis copes d’Europa femenines, pue presumir de contar esta temporada con hasta 7 xugadores nacíes na comunidá nuna plantía formada por 12 deportistes, amás d’una entrenadora de la casa
Falar del Club Patín Gijón Solimar, Telecable por cuestiones de patrociniu, son pallabres mayores. La so Intercontinental, seis copes d’europa, cinco lligues —la última la temporada pasada—, cinco copes de la Reina y dos supercopes convierten a esta entidá de ḥoquei patinos de La Calzada nacida nel 1995 na de mayor ésitu d’Asturies. Un ésitu que rescampla entá más por tar basada nun gran trabayu cola cantera. Como amuesa, un botón: 7 de les 12 componentes de la plantía actual, entrenada por una ex xugadora como Natasha Lee, nacieron na comunidá.
«Ye verdá que somos un club que trabayamos siempre la cantera y que siempre nos alimentamos de xugadores de cantera», apunta’l so direutor, Fernando Sierra, qu’especifica que «la evolución y el nivel competitivo xube en tolos sitios y tienes siempre que fichar y retocar dalgo». Los 210 xugadores, moces y mozos, que tien anguaño federaos el Telecable —a los qu’hai que sumar otros 70 coles que trabaya en colexos— son la base de la que tira siempre l’equipu xixonés pa competir coles meyores, clave pal ésitu d’una entidá que funciona como una gran familia. «Dizlo’l nuesu lema, ‘mi equipo, mi gente’. Agora facemos un brindis en Navidá, vamos a tar unos díes en Mercaplana cola Asociación de Clubes de La Calzada, decoramos la pista de L’Algodonera, n’Antroxu vamos al desfile… Facemos actividaes que van más allá del deporte y de competir», rellata. Nelles nun falten, siempre que l’axenda deportiva lo permite, les integrantes del primer equipu.
Asegura Sierra que los equipos del Telecable busquen dende abaxo competir, «pero tamién que la xente se vaya educando en determinados valores. Siempre falamos del respetu, de la igualdá, de l’allegría y del compromisu». Será por eso polo que cuenta con una gran cantidá de neñes y neños que quieren xugar ḥoquei patinos, pero el club tien limitaciones por cuenta de la falta d’instalaciones. Dispón de la pista de L’Algodonera pa los equipos de la base y del pabellón de Mata-Xove pa los dos senior, el femenín y el masculín, que compite n’OK Bronce, la tercer categoría. «Necesitamos yá qu’haya una segunda pista habilitada pa ḥoquei patinos en Xixón, porque en dalgunes categoríes tenemos llista d’espera. Contamos con 20 equipos y nuna sola pista nun cabemos. Esa segunda pista permitiríanos siguir creciendo y atender la demanda qu’hai», afirma’l direutor.
L’ampliación de Mata-Xove, agora con 504 places d’aforu, permite atender dende la temporada pasada los deseos d’acudir a los partíos de munchos aficionaos del club, yá que los cerca de 400 socios colos que cuenta la entidá dexaba pequeñu’l pabellón pa munchos partíos. Otru exemplu del crecimientu d’un club que se marca como oxetivos «caltener los resultaos a nivel deportivo col femenín y siguir avanzando en visibilización y el reconocimientu de la sociedad hacia lo que faen, asina como na profesionalización que tien que trayer esto tamién». Y con respeuto a los mozos, señala que «tamos nun proyeuto de mediu plazu con un equipu tamién basáu en xugadores de la cantera. Llevamos yá unos años en categoría nacional y en pocos años querríamos tar na siguiente».
El Telecable pue presumir amás de protagonizar ‘El pallabreru del ḥoquei patinos’, asoleyáu nel 2018 pola Oficina de Normalización Llingüística, una forma de dar a conocer los términos n’asturianu d’esti deporte y la propia modalidá en sí, y qu’amuesa’l compromisu del club pa cola llingua asturiana. «Tuvo collaborando Xuan Ramón Naves, presidente del club naquel momentu, y nos dibuxos pueden reconocese a xugadores del club», esplica Sierra. Una gran idea p’averar el ḥoquei patinos a los más mozos.
