Dende va una década vien prauticándose n’Asturies esta modalidad inspirada nun xuegu sobre’l que xira la película de ciencia ficción ‘La sangre de los héroes’; l’Asociación Juvenil Jugger Asturias, qu’entrena nel colexu xixonés Santa Olaya y n’Uviéu, cuenta con una ventena de xugadores activos
Xuégase con armes, anque ye difícil salir mancáu d’un partíu. Consiste n’anotar, pero la misión de cuatro de los cinco miembros del equipu nun ye facelo, sinón tratar de dexar espaciu llibre al quinto, el so especialista, pa llegar a la base rival con un oxetu. Falamos del ‘jugger’, «un deporte alternativu creáu n’Alemaña a partir de la película ‘La sangre de los héroes’ (1989, David Webb) que básicamente mez coses de la esgrima, de la llucha grecorromana y podríamos dicir tamién del rugbi», esplica Erik López Ríos, presidente de l’Asociación Jugger Asturias, nuna conversación n’asturianu dafechu. «Ye un deporte coleutivu, d’equipos», amplía, «nel que s’enfrenten dos equipos cinco pa cinco. Cuatro lleven los implementos, que llamamos, que son los palos o armes, y el quintu ye’l corredor y l’únicu que pue garrar el ‘jugg’, que sería la nuesa pelota, y pueden marcar puntu. Les otres cuatro persones tienen que defendelu básicamente pegándose contra l’otru equipu y permitir al corredor que tenga un camín pa marcar el puntu».
La primer impresión al lleer este llinies ye que tamos falando d’un deporte duru, agresivu y hasta peligrosu, pero tolo contrario. «Anque paeza violentu, el ‘jugger’ nun lo ye pa nada», apunta López Ríos, que esplica que les armes tán feches «con bambú protexíu con churru de piscina, tán acolchaes pa nun mancar». Amás, «si das un golpe mui fuerte ye falta o inclusive espulsión», añade. Otra carauterística ye que se trata d’una modalidá «inclusiva, xuégase manera mesta. Nun hai nenguna discriminación y si la hubiera tomaríense midíes pa que nun l’haya».
Los partíos xuéguense nun octágonu de 40×20, anque pue variar, al igual que la so duración, que camuda «según los sistemes de los torneos, pero suelen allargase alredor de media hora o 40 minutos», de los que xuegu completu son «15 o 20 minutos en partíos llargos». El ganador nos últimos torneos que se tán celebrando «ye’l que llega a un númberu de puntos o a diferencia de 10. Tamién pue facese a sets, hai variedá», rellata.
Pa facer puntu ye necesario que’l corredor, únicu de cada equipu ensin armes, llegue col ‘jugg’ a la base rival. Los otros cuatro sí que lleven diferentes implementos: «Tenemos cinco palos y una bola. La bola ye como un mangual, podemos dicir, la más ofensiva de toes y namás pue haber una por equipu, mientres que los palos son diferentes, dende una espada llarga de tola vida hasta la conocida de Darth Vader con dos filos, espades dobles o con escudu. Pue haber la combinación que se quiera». Nel casu de recibir impautu de la bola o con un arma, «recibes una penalización pola que tienes que tar en suelu per cinco intervalos, que son unos sonidinos que tán sonando tol ratu nun tornéu”. Éstos repítense cada segundu y mediu «y cuando pasen cinco intervalos, puedes volver a xugar».
Nun esiste lliga de ‘jugger’ nin a nivel autónomicu nin estatal, pero sí diferentes torneos. «Funciona un poco como’l tenis. Tenemos cuatro torneos nacionales grandes, que van por cada estación, y un internacional que se fai en setiembre en Madrid. Pero tamién s’entamen pila de torneos rexonales; equí n’Asturies tenemos ún n’agostu al que vien xente de toa España. Y l’añu que vien ye’l Mundial». Ésti ye de clubes y l’oxetivu de Jugger Asturias ye tar presentes. «Quieren llegar a 100 equipos l’añu que bien», destaca.
Nel casu del conxuntu asturianu falamos d’asociación xuvenil y non de club, yá que esti deporte nun ta reconocíu como tal, tolo contrario qu’asocede «en Murcia, n’Alicante y en Castilla y Lleón, onde ta dientro de la Federación de Llucha como modalidá deportiva». En total hai una ventena de xugadores activos qu’entrenen los domingos en Xixón, en el CP Santa Olaya, a les 11 hores, y n’Uviéu, nel Parque d’Iviernu, los martes o xueves a les 17 o 18. «Tenemos una media de 15 pesones en Xixón y n’Uviéu somos menos xente al ser per selmana; tamos ente 5 y 7», apunta López Ríos, qu’esplica que los xugadores del coleutivu que preside son d’estes dos ciudades y Castrillón, como él mesmu, natural de La Fundición.
Esti conceyu ye precisamente onde ta’l niciu de Jugger Asturias, fundáu nel 2016 como Jagger Castrillón. «Esti añu 2025 xuntamos Jugger Castrillón y Jugger Xixón pa formar Jugger Asturias, y d’ehí entamamos el proyeutu de Jugger Uviéu y toles coses que fiximos esti añu». Un trabayu d’años que-y permitió al equipu, depués d’una reestructuración fecha l’añu pasáu, finalizar nel top 16 nel Internacional de Madrid, celebráu en setiembre n’Aranjuez con 44 participantes, col que s’entama la oficialmente la temporada.
«Nel ‘jugger’ práuticase muncho’l bon rollu, pásase mui bien y nos torneos deprendes un montón de la xente que lleva más tiempu xugando, amás de conocer a muncha xente», apunta López Ríos, qu’anima a toa persona interesada en prebar esta disciplina a contautar con Jugger Asturies peles sos redes sociales, Instagram sobre manera. «Pasámos-yos la información correspondiente y pueden venir cuando quieran a los entrenos que facemos tanto en Xixón como n’Uviéu», apunta. El material ponlo Jugger Asturies. ¿Atréveste a garrar l’arma?
