Tolos vienres del mes, l’uvieín Teatru Filarmónica va acoyer una función con motivu de la fase final del IX Premiu Nel Amaro de Teatru Profesional en Llingua Asturiana o Gallego-asturiano y la representación de la obra ganadora l’añu pasáu, ‘Perendi’ de La Compañía del Alba
El IX Premiu Nel Amaro de Teatru Profesional en Llingua Asturiana o Gallego-asturiano llega a la so fase de festival cola puesta n’escena de les cuatro obres finalistes d’esta edición. Una oportunidá pal xuráu pa ver en direuto les diferentes histories presentaes a concursu y pal públicu pa disfrutar tolos vienres d’ochobre d’una función n’asturianu de baldre. Amás, pa poner el ramu, l’últimu del mes, el 31, la Compañía del Alba va representar la historia cola que ganó na edición anterior, ‘Perendi’, de La Compañía del Alba, dirixida por Carlos Alba ‘Cellero’ y protagonizada por él mesmu, Carmen Gloria y Cova Cobos.
La primera de les cuatro finalistes, la que va abrir esta tarde’l festival a les 18.30 hores, va ser ‘1001. Una odisea nel desiertu’, una obra infantil d’Higiénico Papel Teatro, compañía ganadora de los años 2018 y 2020 con ‘Hansel y Gretel’ y ‘El viaxe de Covaletti’, de manera respeutiva. Un mozu de nome Karim protagoniza esta propuesta enllena de fantasía, alfolmbres voladores y aventures creada y dirixida por Laura Iglesia, con Félix Corcuera, Carlos Dávila, Arantxa Fernández Ramos y Loretta Church nel repartu. Adolfo Camilo Díaz encargóse de la so versión n’asturianu.
Va siguir el vienres viniente ‘Tía miseria’, de Covenant Producciones, un trabayu de teatru de cai pa mayores de 13 años que se va representar a les 20 hores, y, yá el 17, a la mesma hora, ‘Vuelu d’andarines’, pa un públicu adultua, de Producciones Nun Tris, ganadora en 2021 con ‘La reina la guapura de Leenane’. Completa la llista de finalistes ‘Al rodiu l’horru’, d’E Vero Teatro, programada pa les 18.30 hores al tar destinada pa la reciella. El día 30, mentes, va ser la oportunidá de disfrutar de ‘Perendi’ a les 20 hores.
El ganador del IX Premiu Nel Amaro de Teatru Profesional en Llingua Asturiana o Gallego-asturiano va llevar una recompensa de 6.000 euros, amás de la oportunidá de formar parte del programa ‘Autores nel Camín’ y llegar asina a diferentes puntos del territoriu asturianu. L’oxetivu d’esti gallardón que lleva’l nome del polifacéticu artista turonés ye’l de «afianzar, arriquecer y prestixar la llingua asturiana y l’eonaviegu nel ámbitu del arte dramáticu».
