El campu La Cruz y la Carbayera, onde celebren Santiago y Santana, de manera respeutiva, vivieron el vienres una gran nueche festiva con una importante participación que se ta repitiendo esti sábadu nuna xornada marcada pol calor y la puesta en valor de la tradición
Les Fiestes Populares de Ciares y les Fiestes de Santana enllenen d’allegría y tradición esti barriu xixonés y la parroquia de Granda, en concreto dende ayeri: nel campu de fútbol La Cruz, nuna nueche con soníos rock de la mano de Dinosaurio Meteorito, Montefurado, Tribute Against The Machine e Ilustres Patilludos, y dende’l martes na sede vecinal y la Carbayera, de manera respeutiva. Y lo que queda, con estos dos llugares enllenos de xente celebrando en comuña colos sos pañuelos blancos solidarios col lema ‘Llevamos la romería dentro. ¡Vive lo que sentimos!’ que se tán moviendo nes fiestes entamaes en Xixón polos propios vecinos pa los sos vecinos.
«Hai munchísima xente y nun ambiente mui guapo», confirma Víctor Díaz Carnero, voceru d’Esto Ye Ciares, asociación qu’entama les Fiestes Populares de Ciares, qu’esperaba la llegada d’una nube pa tener dalgo de solombra nun día mui calurosu. «Ayeri superamos les espeutatives que teníemos, al menos les igualamos porque sabíamos que yera un mui bon cartelu. Y tuvo’l recintu enllenu hasta la hora nos obligó a pesllar el campu”.
Les Panderetetes de Ciares punxeron esta mañana les primeres notes musicales a la xornada na que Juan Carlos Díaz tuvo l’honor de dar un pregón mui emotivu nel que repasó toa una vida de dedicación a Ciares y nel que nun faltaron munches anéudotes. Darréu el Balonmano Gijón recibió’l Premiu Teyera Exemplar y arrancó la romería, na que nun faltó’l repartu del bollu y la botella, más de 200, y la xinta nel prau, los más mayores na comodidá de les meses instalaes y los más mozos en suelu colos sos manteles.
Munchu baille y música tradicional animen una tarde que va finar con una folixa coles actuaciones de 6 Riales (20 hores), Mediarea (22 hores) y La Tarrancha (00 hores), p’acabar con una pinchada dende les 2 hasta’l pieslle, previstu pa les 4. Mañana ta convocada una sestaferia a les 17 hores pa dexar el campu como taba y depués xubir a Granda a compartir colos sos vecinos y disfrutar de la so XXVI Nueche Celta.
Na Carbayera la diversión tampoco nun falta. «Les fiestes tán saliendo fenomenal», confirma Gloria Sánchez, integrante de la Comisión de Fiestes. «Ayeri nes sardines vendióse too. Había muncha xente y ambiente mui guapu, col DJ (Vas Bailar) baillando y una nueche mui guapa», esplica, y güei celebraron la corderada, pa la que se vendieron 362 vales, cola carpa enllena, «yá qu’hai xente que nun come corderu y prefier calamares o picadiellu que tenemos na cocina».
Pa esta tarde ta prevista la cuarta competición de balón prisioneru por equipos, el taller infantil de repostería y lo que la organización llama ‘tardeo’, una de les novedes d’esti Santana. «Y llueu tendremos otra vuelta al DJ y a la orquesta Cayena», la gran verbena viéspora del día grande de les fiestes «cola alborada pela mañana, la misa, la puya’l ramu, el vermutín de rigor y, yá pela tarde, el taller de baille y la Nueche Celta» con Trebeyu, Herbamora, Pandereteros d’Anguañu y los irlandeses Beeswing, que yá se dexaron ver pola fiesta. «Tuvieron per equí, yo nun pudi falar con ellos porque taba na cocina, pero les cares que teníen yeren de sorpresa cola sidra. Debió de presta-yos».
En Granda, la fiesta va allargase hasta’l llunes, cuando se celebra’l Día del Sociu, cuando se dará una misa por los difuntos al meudía y los vecinos recibirán el bollu y la botella de vinu dende les 19.30 hores. Habrá nel prau de la fiesta tiru cuerda de solteros contra casaos, l’animación de la charanga Ceda el Paso y una cena de confraternización, a la que siguirá’l revolucionariu ‘nocheo’ orientáu a los mozos como fin de Santana énte la imposibilidá de contar con orquesta en día llaborable.
Otra manera, l’Asociación de Vecinos La Cruz de Ceares, que nun entama esti añu la fiesta con orquestes y animación en Los Pericones, festexa esti añu Santiago con un responsu y ufrienda en La Cruz de Ciares polos difuntos, que tuvo llugar esti meudía, y mañana celebra a les 11 el pasucais tradicional peles cais del barriu, una misa solemne a les 13 hores y la corderada en la pista del CP Los Pericones.
Vasu reutilizable de les Fiestes Populares de Ciares, col patrociniu de miGijón. / Reportaxe fotografíu con semeyes de miGijón, Esto Ye Ciares y la Comisión de Fiestes de Granda 
Ambiente en La Cruz nos momentos previos a la segunda actuación. 
Actuación de Tribute Against The Machine. 
El públicu disfrutó colos cuatro grupos de rock d’estilos estremaos. 
El pregoneru Juan Carlos Díaz, con una placa. 
El Balonmano Gijón recibió’l Premiu Teyera Exemplar. 
El sol pegó fuerte en La Cruz. 
El pulpu, gran novedá de la romería, trunfó. 
Munchos socios optaron por xintar nes meses instalaes nel prau. 
Les sardines protagonizaron la nueche d’ayeri en Granda. 
Los cocineros, empiezan con la preparación del pescado. 
El bon tiempu acompañó tamién esti día. 
La carpa tuvo repleta. 
Vas Bailar animó la nueche. 
El corderu faciéndose pa la xinta de güei. 
Los responsables de preparalu, cola carne.
