La llevantadora de 14 años del Club Halterofilia La Corredoria acumula un Européu sub-15, un Nacional sub-17 y llevó tres oros nel sub-15 celebráu esti mes onde algamó la meyor marca de la competición, resultaos qu’amuesen el so potencial
Brisbane. Esta ciudá australiana repítese nos suaños d’Inés Conde, llevantadora uvieína que ta sorprendiendo polos sos resultaos magar que lleva namás cuatro años práuticando halterofilia. «El mio oxetivu ye llegar a los Xuegos Olímpicos del 2032», tien claro al ser entrugada y, si sigue cola actual proyeición, nada impedirá que lo consiga. A los sos 14 años vien de ganar un Européu sub-15, un Nacional sub-17 —con 13 años—y al entamu d’esti mes consiguió nos Nacionales sub-15 celebraos en Cullera tres oros, amás de rexistrar la meyor marca de la competición. Brisbane 2032. Ésa ye la cita.
«Probara munchos deportes: kárate, ximnasia rítmica, natación…, y nengún me pillar del too, pero Blanca —la so entrenadora— yera era amiga de la mio familia dende va tiempu y un día entrugó a los mios padres si quería probar. Fíxilo y enganchéme», comenta Conde. En estos cuatro años el so desarrollu foi espectacular, pero, amás de tener condiciones, l’esfuerciu nel entrenamientu inflúi. «Son dos hores fixes, de llunes a vienres, pero cuando nun hai institutu, en branu, doblo polo menos tres díes. Y sin nun tengo esámenes o tarea, puedo llegar a les tres hores diaries», esplica. Inclusive, dalgún sábadu desplázase a Lleón, al centru d’altu rendimientu de la Federación, a «trabayar fuerza».
La rutina ye siempre asemeyada. «Los entrenamientos son mui duros y lo primero que faigo ye calentar pa evitar lesiones. Depués faigo arrancada o cualquier tipu de variación de l’arrancada, pa llueu pasar al dos tiempos o cualquier variación del dos tiempos. Darréu suelen facese tirones, que ye pal despegue de l’arrancada y del dos tiempos. Y siempre depués, sentadines y dalgún complementu llombar, abdominal, saltos…», espresa. Sobre les condiciones necesaries pa prauticar esti deporte señala que «tener muncha disciplina, querer trabayar y trabayar. Llueu yá si tienes talentu, bien. Si tienes talentu y disciplina vas llegar lloñe, y si tienes muncha disciplina tamién vas llegar mui lloñe». ¿Ye más fuerza o habilidá? «Necesítase téunica, porque si nun tienes esa téunica la fuerza nun la vas trabayar bien», apunta.
Mínima pal Mundial, consiguida
La competición va por pesos y por categoríes, y los deportistes salen a la tarima pa realizar tres intentos, tanto p’arrancada como pa dos tiempos, pa llevantar el pesu que se marque. De consiguilo, puedes xubilu nos siguientes. De momento, l’ésitu que más recuerda ye’l «campeonatu d’España sub-17, que lu gané con 13 años y foi una emoción mui grande pa min. Y l’Européu, que lu gané esti añu na mio primer participación». L’oxetivu más a curtiu plazu ye’l Mundial del añu qu’entra, pal que yá tien la mínima, que «son 155, esto ye, 70 y 85 o 75 y 80 n’arrancada y dos tiempos, de manera respeutiva». «Namás falta que me digan que voi dir, pero sí me veo ellí y a vr si puedo consiguir medaya», espresa con ilusión.
Sobre’l so futuru a más llargu plazu, apunta que-y prestaría «ser policía, pero anque tenga que sacar les oposiciones, gustaríame siguir cola halterofilia». Y nel horizonte, Brisbane. «Ye lo que más m’apetecería, sobre manera poder ganalos, anque yá tar ellí sería un privilexu», asegura. Per delantre queda entovía munchu trabayu. Xunto a ella siguirá Blanca Fernández, la so entrenadora nel Club Halterofilia La Corredoria que «dende’l primer día yá m’empezó a dicir que tenía munches cualidades, que se me daba mui bien y que podía llegar mui lloñe». La téunica, arguyosa de la so alumna, llamenta «qu’a Inés pa que la saque na prensa o pa que-y faigan casu dende l’Ayuntamientu o’l Principáu tien que facer el doble y nun ye xusto, porque una deportista de la so edá, con tolo que ganó, debería tener más visibilidá. Lo que nun val ye que cuando tea nunos Xuegos Olímpicos tol mundu quiera salir na semeya. Hai primero un tránsitu nel qu’hai que sofitala».
Mientres, la uvieína siguirá esforzándose tamién nos estudios. «Nel institutu les moces apóyenme bastante, pero a los mozos nun-yos da más el mio deporte, nun quieren nin probalu nin saber cómo va, pero yo creo que-yos gustaría muncho si lo fixeren», respuende sobre cómo ven la so trayeutoriu deportiva. De fechu, apunta que n’Asturies «somo más neñes que neños». «Animaría a tolos de la mio edá a probalo, porque nos los pasamos mui bien, compartimos munches coses y ye un deporte que te da munchos valores, disciplina y paciencia», destaca esta campeona que va dar muncho que falar.
