La organización, que presenta delles aportaciones a la futura norma, considera «especialmente grave qu’una llei destinada a regular la cultura y la identidá d’Asturies nun incluya nenguna referencia espresa a les llingües propies del territoriu»
El Gobiernu presentó recién nel portal ‘Asturias Participa’ la consulta pública previa a la redaición del borrador de la Llei del Principáu d’Asturies de Cultura y Identidá, promovida pola Direicion Xeneral d’Aición Cultural y Normalización Llingüística, cola fin de que coleutivos más representantivos d’esti campu y ciudadanos pudieran dar les sos aportaciones. Ye’l casu d’Iniciativa pol Asturianu, que presentó enantes del sábadu, cuando finaba’l plazu, delles propuestes pa que la futura norma «integre la llingua asturiana». Al respeuto, la organización alvierte de «importantes carencies» nel testu qu’acompaña l’anunciu colos argumentos sobre la necesidá de la so aprobación, oxetivos y soluciones alternatives.
Iniciativa llamenta que «nun cumple los criterios llingüísticos aprobaos pol propiu Gobiernu del Principáu, al publicase únicamente en castellán y escluyir l’usu del asturianu y del eonaviegu, contraviniendo les directrices de comunicación institucional del sector públicu asturianu». D’igual forma, considera «especialmente grave qu’una llei destinada a regular la cultura y la identidá d’Asturies nun incluya nenguna referencia espresa a les llingües propies del territoriu, pese al so reconocimientu nel Estatutu d’Autonomía, na Llei d’Usu y Promoción del Asturianu y a lo que recueyen en materia llingüística tanto la Constitución Española como la Carta Europea de les Llingües Rexonales o Minoritaries».
Ye por eso que reclama que «la futura llei asturiana vincule de mou claru llingua y cultura, otorgando al asturianu y al eonaviegu un papel central dientro del marcu normativu pa facer efectivu l’usu de los idiomes propios na acción cultural». Amás, solicita que la entidá «seya reconocida como parte interesada nel desendolcu y tramitación de la Llei de Cultura y Identidá, reiterando la so disposición a contribuir a una norma que reflexe de mou real y efectivu la pluralidá cultural y llingüística d’Asturies», ufiertando asina la so «collaboración de mou positivu y activu col Gobiernu asturianu pa llograr una normativa plenamente consensuada y efectiva, contando coles aportaciones del texíu asociativu».
