La Fundación Municipal de Cultura, Educación y Universidá Popular dio a conocer un avance de la programación del certame dedicáu a la cultura atlántica que va tener llugar del 29 de xunetu al 3 d’agostu con un únicu conciertu na Plaza Mayor, el del dúu de la comunidá vecina
La segunda edición de la segunda etapa del Festival Arcu Atlánticu, recuperáu l’añu pasáu llueu del parón ente 2020 y 2023 por decisión del gobiernu del PSOE, yá tien fecha y parte de la so programación. Esta décima entrega va celebrase del martes 29 de xunetu al domingu 3 d’agostu con formaciones asturianes, gallegues, bretones y vasques, en distintos allugamientos y con un únicu conciertu na Plaza Mayor, el de les gallegues Fillas de Cassandra na xornada inaugural a les 22 hores.
Enantes, DAB, compañía de danza vasca, va presentar a les 19 hores na plaza’l Marqués una propuesta artística qu’afonda sobre les metodoloxíes de trabayu a comuña ente Eduardo Chillida y Cristóbal Balenciaga per aciu del movimientu. El miércoles va ser el turnu de José Manuel Tejedor col so proyeutu en solitariu a les 19.30 hores nel Muséu del Pueblu d’Asturies, mientres qu’a les 22 hores va ser posible ver a los bretones Skolvan nel Centru de Cultura Antiguu Institutu.
Completa l’avance l’acróbata vasca La Glo, que va facer danza vertical el vienres a les 23 hores na Torre del Reló, nel barriu de Cimavilla, nun espectáculu entituláu ‘Sacred’. Nos siete díes de programación tamién va haber espaciu pa proyeiciones audiovisuales, demostraciones d’artesanía, talleres y xuegos pa la reciella, percorríos teatralizaos y actividaes venceyaes cola gastronomía atlántica en dellos puntos de la ciudá.
«Va ser una amuesa representativa de la creación artística d’anguaño, inspirada mesmo na tradición que na vanguardia, y tamién de les identidaes culturales de los territorios que formen parte del denomáu Arcu Atlánticu», apunten dende la Fundación Municipal de Cultura, Educación y Universidá Popular.
