Esti vecín nacíu en Feijoo recibe esti honor cuando se cumplen 60 años del entamu de la foguera de San Xuan per parte d’un grupu d’habitantes del barriu qu’él encabezó, que ganaría aquel añu el campeonatu que s’organizaba en la ciudad, lo que permitiría recuperar la romería de Ciares coles perres del premiu
Acércase el branu y, con él, l’entamu de les diferentes fiestes que se celebren nos barrios y parroquies de Xixón. En Ciares, l’asociación vecinal Esto Ye Ciares, va repetir les Fiestes Populares pa Santiago, los días 25 y 26 de xunetu, dau l’ésitu de les mesmes y yá ta zarrando los detalles últimos d’un programa que se va presentar de manera oficial el sábadu 21 de xunu a les 18.30 hores nel campu de La Cruz nel marcu d’un ‘Ciares en Danza’ cola participación de les Pandereteres de Ciares. Sicasí, esti coleutivo ta acabante d’adelantar una parte mui importante de toa celebración, como ye’l del pregoneru.
L’honor esti añu va ser pa Juan Carlos Díaz, nacíu nel tramu de la cai Feijoo que pasa pel barriu y responsable, xunto a un grupu de vecinos, d’organizar nel 1965 la primer foguera de San Xuan de Ciares, agora desapaecida. Foi un pasu clave pal movimientu vecinal del barriu, yá que coles perres del premiu del campeonatu de fogueres que s’entamaba en Xixón decidióse recuperar la romería de Ciares, que se celebraba tiempu atrás en Les Quintanes y, munchu enantes, nel entornu de la ilesia de San Andrés. «Un elementu que destacó de la foguera foi la llancha que traxeron dende Cimavilla a Ciares emburriando Hermanos Felgueroso arriba. Juan Carlos cuenta a esti respeuto que la xente asomaba a les ventanes y echaben les manes a la cabeza», espliquen dende Esto Ye Ciares. «Juan Carlos y los sos collacios, cuando-yos entrugaben pa onde diben con una llancha de cuasi 7 metros respondíen ‘ye que van poner un puertu deportivo en Ciares’», añaden.
El pregoneru de les Fiestes Populares de Ciares del 2025, con llectura prevista pa les 13 hores del sábadu 26 de xunetu, llicencióse n’Historia y trabayó siempre como maestru. Tuvo tamién venceyáu deporte, en concreto al balonmanu, na figura d’entrenador y de miembru de la Federación Asturiana, y a la natación, amás d’al teatru. Cuando cambió de barriu siguió llevando con arguyu’l nomatu que dende pequeñu-y punxeron na escuela: ‘Ceares’. «Hai munchos paralelismos ente’l tiempu que-y tocó vivir a Juan Carlos, va yá 60 años, y el que nos tocó, al traviés d’Esto Ye Ciares, vivir nestos cuatro años últimos a nós. N’époques diferentes tocónos recuperar unes fiestes entamaes y trabayaes polos propios vecinos y, magar el pasu de más de mediu sieglu, siguir defendiendo la identidá de Ciares», apunta esti coleutivu.
