El Mortero acueye cinco temporaes depués partíos de Segunda Rexonal, agora Tercera Asturfútbol, d’esti equipu historicu del fútbol xixonés fundáu nel 1957; «yéremos bastantes d’últimu añu y llevámonos mui bien», apunten los xugadores, que convencieron a la direutiva pa formar un senior
La temporada 20-21 foi la última na que’l Club Deportivo La Braña contó con equipu senior, campaña marcada pola pandemia de COVID-19 y un formatu de competición improvisáu, con subgrupos. «Quitámoslu porque hebo ehí un parón, munchos chavales nun quixeron siguir y dicidimos desanicialu al haber pocos xugadores», recuerda’l presidente Luis Carreño. Esti branu la situación camudó dafechu y el club conocíu por ser la plataforma de Luis Enrique pa volver al Sporting, depués d’una cesión al so xuvenil, decidió dar el pasu de recuperar les categoríes autonómiques: «Vinieron per equí, pela oficina, en xunetu xuveniles d’últimu añu diciendo que queríen siguir. Cuando yá xuntamos unos cuantos diximos ‘bono, vamos plantegalo’, a ver si hai manera de ser bastantes pa sacar un equipu serio. Falamos con Rubén (Piñera), que tuvo l’añu pasáu cola gran mayoria, pa ver si quería garralos y too foi bastante fácil», espresa.
«Yéremos un montón los que queríamos siguir xugando xuntos y decidieron recuperar el rexonal», recuerda Iker Calzada, estremu izquierda que lleva siete años nel club. Otros como, Hugo Rodríguez, tomó la decisión de continuar poco depués: «Como fixeron l’equipu, prestónos la idea de quedanos en La Braña». Esti tamién estremu, anque pela derecha, taba decidíu «a dexalo» al acabar la so etapa xuvenil, pero la posibilidá de continuar colos sos compañeros y el fechu de qu’estudie en Xixón fixo que nun colgara definitivamente les botes. «Había un mui bon rollu nel vestuariu», rellata.
«Anguaño con 19 años dexen de xugar toos, poques salíes tienen. Col equipo senior crecemos n’estructura y ye una forma de dar salida a eses xerenaciones que van cumpliendo etapes», apunta Carreño. L’oxetivu no deportivo ye pal presidente «lluchar por ascender, pero hai que ver cómo se desendolca la competición. Lo que queremos ye que polo menos compitan». El míster, mentes, muéstrase más claru: «ye quedar quintu». «Creo qu’esti añu hai bastante nivel porque hai equipos que se reforzaron bastante, con xuveniles tamién combinaos con xente que yá tien esperiencia na categoría, y que va haber 4 o 5 bastante punteros. El restu taremos ehí lluchando por metenos en promoción —del segundu al quintu puestu—», esplica Piñera nun rápidu análisis del grupu 1 de Tercera Asturfútbol.
Pa ello, el míster, que vuelve a la categoría, cuenta con un grupu de futbolistes que tuvo al so mandu l’añu pasáu nel xuvenil A, que finalizó terceru nel grupu 1 de Segunda, amás d’otros futbolistes d’últimu añu del club y «8 de fuera». Ente éstos últimos ta Adrián Amez, central de 28 reclutáu por Piñera pa dar esperiencia a un equipu mui mozu. «Pertenecía al Perchera, club tamién d’equí —xuega al igual que La Braña n’El Mortero—, y acabo en La Braña pol ambiente que se respira, que me paez escelente, y por Rubén (Piñera) que me motivó pa volver a xugar a fútbol 11», comenta’l veteranu d’una plantía formada «por chavales qu’acaben de salir de xuveniles y otros dos chicos que tienen 22 y 23 años». «Tócame ser un poco l’entrenador dientro del campu», rii al tiempu que celebra que «La Braña torne a tener un equipu de rexonal porque ye un club de lo meyor qu’hebo en Xixón y n’Asturies y que ta trabayando pa volver a crecer, que se nos vuelva a ver pelos campos d’Asturies».
Sobre les espeutatives, Rodríguez espera «optar al play-off», mentes que Calzada afirma que «veo al equipu bien y creo que vamos quedar arriba na tabla». «L’equipu ye mui mozu, asina que lo importante ye que se vayan adaptando a la categoría, competir hasta onde nos dea. Sí ye verdá que dende dientro tenemos un poco la ilusión d’intentar mirar hacia arriba, poder competir unos play-offs, más que nada para que la temporada nun se faiga llarga», opina mentes Amez.
270 futbolistes y 20 equipos
La esistencia d’un conxuntu senior completa la estructura de La Braña, con neños en toles categoríes dende los 5 años. «Hai unos venti equipos y 260 xugadores», apunta Carreño, amás de «60 entrenadores ente téunicos, segundos y ayudantes». «Lo primero ye que los chavales se diviertan, que se formen como xugadores y como persones. Y depués, poco a poco dir recuperando lo que fuimos va años. Cuesta muncho, pero queremos que los chavales tean contentos, a gustu, y que los téunicos trabayen bien pa que, a partir d’ehí dir creciendo como club», destaca’l presidente, que confiesa que «entovía tien muncho nome, Luis Enrique ta agora de moda y tamién atrái». Y ye que’l ganador del Trophée Johann Cruyff como meyor entrenador del mundu nun escaez al que fora so equipu, al que noma davezu n’entrevistes y redes sociales. Un argayu pa La Braña y un espeyu nel que mirase pa los sos futbolistes.
