Un ‘Rincón Sidreru’ va acoyer prebes y concursos d’echadores de sidra, y va entamase un alderique nel ágora central, ente otres munches actividaes, «pa poner en valor la cultura sidrera» asturiana, declarada Patrimoniu Cultural Inmaterial pola UNESCO
Son munchos los atractivos que tien Asturies, pero quiciabes l’elementu diferencial que más llama l’atención al visitante ye la sidra. Una bébora siempre presente nel puestu d’Asturies na Feria Internacional de Turismu (FITUR), qu’acueye Madrid esti añu del 22 al 26 de xineru, pero que nesta ocasión «va tener un protagonismu mayor pa conmemorar la declaración de la cultura sidrera como Patrimoniu Inmaterial» pola UNESCO, rescampló la vicepresidenta Gimena Llamedo en castellanu na presentación del puestu d’Asturies na feria, celebrada esta mañana na Llaboral.
«Per tolos díes de FITUR van desendolcase numberoses actividaes, les primeres xornaes centraes a profesionales, y el restu, yá abiertes al públicu», esplicó la socialista, qu’añadió que l’oxetivu ye «poner en valor la cultura sidrera y poder averala a toos aquellos que nos visiten tamién». Asina, va haber prebes de sidra, concursos d’echadores de sidra y, nel ágora central, un alderique «sobre les oportunidaes y tolo qu’implica esti reconocimientu p’Asturies y pal turismu». Ente los escanciadores presentes van tar Emilio Rubio y Alejandra Venegas, de la sidrería xixonesa La Montera Picona de Ramón.
