Protagoniza la segunda estancia creativa del añu nesti apartamentu del barriu L’Arena y va presentar la so novela última, ‘Los días se hacen solos’, el xueves con un diálogu con Inaciu Galán na Librería de Bolsillo
La Residencia Lliteraria Xixón sigue acoyendo a escritores de toles partes del mundu. La siguiente en disfrutar de la so comodidá y tranquilidá pa desendolcar los sos proyeutos lliterarios ye la vasca Garbiñe Salaberría, autora que tien espublizaos dellos llibros empobinaos a un públicu infantil y xuvenil y tornaos al eusquera, que s’estrena agora con una novela p’adultos en castellanu, ‘Los días se hacen solos’ (Íbera Ediciones).
Sobre esta historia, ambientada en Bilbao, va falar el xueves a les 20 hores na Librería de Bolsillo (Marqués de Casa Valdés, 67) nun diálogu con Inaciu Galán, direutor de la Residencia Lliteraria Xixón. Como ye vezu, la estancia creativa va completase con actividaes qu’averen la obra del autor a la llingua asturiana.
