Esti arte marcial chinu con grandes componentes filosóficos tien cerca de cien prauticantes de toles edaes nesti centru de Laviada qu’acumula medayes nos diferentes torneos a los que va; «la nuesa filosofía ye entrenar y deprender pa nun tener qu’usalo», diz la so fundadora Silvia Pérez Blanco
Mui popular pola so presencia en películes y series d’aición, con nomes como Bruce Lee, Jackie Chan, Donnie Yen o Jet Li, el kung fu ye una de les artes marciales más reconocíes. D’orixe chinu, ta mui enllazada a la filosofía y la salú, tien téunica de defensa personal y ye mui recomendable pa toles edaes. Sábenlo bien los cerca de cien prauticantes de la Escuela Nei de Artes Marciales, asitiada en Laviada, onde cuenta con un llocal d’unos 200 metros cuadraos, una gran cantidá d’armes pal entrenamientu y combate, y un tatami de grandes dimensiones pa la so práutica.
Silvia Pérez Blanco ye la so fundadora y entrenadora, llabor qu’agora comparte con Enrique Cangas y Iván Cuevas, esti últimu encargáu de trabayar el combate. «N’agostu vamos cumplir 10 años. Yo daba clase en coles y otres escueles y llegó un momentu nel que m’animé a dar el pasu», rellata. Colos años, la Escuela Nei foi ganando un nome nes diferentes competiciones a les que se presenta, como recién al Campeonatu d’España celebráu en Guadalajara’l 22 de payares, onde los sos 13 representantes algamaron, formando parte de la seleición asturiana, 6 oros, 2 plates y 5 bronces, y agora cuenta «con cerca d’un centenar d’alumnos de toles edaes, adultos y neños», amplía la encargada de poner clases de formes y defensa personal y téunica. Y ye qu’esti arte marcial cuenta con «delles modalidaes y estilos».
«La nuesa filosofía ye entrenar y deprender pa nun tener qu’utilizalo, porque’l kung fu qu’utilizamos equí ye aplicable a la cai si pasa daqué, en multitú de circunstancies», esplica esta cinturón prietu de nivel 4. «Ye una práutica que vien mui bien y que ye un camín de crecimientu pa la xente, porque ye autosuperación tol tiempu y disciplina», añade.
Destaca de los sos alumnos precisamente eso, la disciplina, lo que rellaciona colos ésitos nes diferentes competiciones a los que se presenta la Escuela Nei. «Tómenselo mui en seriu», diz Pérez Blanco, que señala que’l perfil ye variáu, «dende neños de tres años hasta xente de setenta y pico». Los entrenamientos duren hora y media pa los adultos y una hora para los rapacinos y les puertes tán abiertes pa tol mundu. «Namás faen falta ganes», apunta esta entrenadora que tien al so mandu a deportistes de parakung fu, como a la cinturón prietu Rosalía Fernández Suárez, dos veces plata nel Estatal últimu. «Al final nosotros lo que buscamos ye que l’arte marcial s’adapte al prauticante, non que’l prauticante tenga qu’adaptase, como pasa a veces, por exemplu nel taekwondo, onde se tien que patiar a una altura».
Mientres siguen los entrenamientos, les competiciones a nivel autonómico y estatal, y les exhibiciones —«tenemos un club hermanáu en Galicia y entós facemos intercambios con ellos una vez al añu, equí y ellí»—, Pérez Blanco caltién un suañu, el de «llevar a la xente a competir internacionalmente. Agora mesmo nun tenemos la opción pola Federación, pero nun futuru s’espera que se pueda». Vistos los resultaos algamaos nos diferentes torneos, los alumnos de la Escuela Nei merécenlo.
