El club nacíu nel 2015 a partir de la xunión del Corpi y el Formabasket cuenta otra vegada dende esta temporada con un equipu de muyeres na so estructura; «na parte de cantera nun buscamos resultaos, sinón que los deportistes ameyoren», apunta’l so presidente José Enrique García Braña
L’equipu de Primera FBPA ye’l destín final, pero enantes hai un llargu camín qu’entama dende los colexos y el benxamín con una filosofía clara: «formar a los xugadores». «Na parte de cantera nun buscamos resultaos, sinón que los deportistes ameyoren. Los resultaos son daqué secundario, nós lo que valoramos ye’l trabayu y l’esfuerciu. Si se fai un bon trabayu, un bon esfuerciu y s’ameyora téunicamente, los resultaos tienen que venir», valora José Enrique García Braña, presidente dende’l final de la temporada 23-24 del Gijón Basket, club qu’esti añu recuperó los equipos femeninos colos que contó nos sos primeros años al crease a partir de la fusión del Corpi (Colegio Río Piles) col Formabasket, club de baloncestu femenín.
Llegó’l dirixente a la presidencia l’añu del descensu d’EBA a la entós nomada Primera Nacional y la intención del club, «tanto la temporada anterior como ésta, foi facer un equipo de Nacional que pudiera volver otra vez a lo qu’agora se llama Tercera FEB. L’oxetivu ye ési, pero non sólo ési, ye tamién crecer na parte femenina, porque hasta agora’l Gijón Basket yera masculín y dende esti añu hai una seición femenina con un equipu senior aprovechando que tenemos un alevín mestu de mayoría de moces que pasará a ser femenín dafechu l’añu qu’entra n’infantil, amás del de madres col que yá contábemos. El senior ta en Segunda FBPA y l’oxetivu ye ascender a Primera FBPA». Pa estes metes apóyase nuna estructura que cuenta con 250 xugadores, contando los colexos, y unos 13 téunicos que desenvuelven el so llabor nel Palaciu de Deportes, onde se xueguen la mayor parte de los partíos del club —los senior empleguen la central—, Xixón Sur y La Teyerona.
Pero amás de tornar a Tercera FEB, el Gijón Basket pretende que los xixoneses «vuelvan a sentir el baloncestu». «Vemos que, d’un poco a esta parte, ta perdiéndose la identidá de baloncestu. Hai munchos equipos, caún cola so idiosincrasia y les sos coses, y sí que queremos concentrar un poco lo que ye’l baloncestu de Xixón, crear un proyeutu estable y referente”, afirma García Braña, consciente del güecu que dexó’l Gijón Baloncesto col so desaniciu nel 2009. «Ye mui grande, un momentu difícil de repetir porque axuntó a distintos clubes emburriando nuna mesma direición. Anque nun sía esautamente igual, la nuesa idea, si xubimos a Tercera FEB, ye dicir qu’esti ascensu nun ye namái del Gijón Basket, sinón de tol que se quiera incorporar a esti proyeutu, abriéndolu tanto a clubes como a xugadores que quieran venir; pa la ciudá. Un poco lo que faen n’Uviéu y n’otres ciudaes, con un equipu referente, lo que nun quita qu’haya más clubes».
Nestos momentos lidera la tabla en Primera FBPA con 8 victories en 8 partíos, anque’l camín ye llargu, fase d’ascensu pel mediu. Mentanto, el club siguirá col so trabayu cola base y una apuesta polos idiomes, ente los que ta la llingua asturiana: «Queríamos entamar a sofitala, como seña d’identidá, poniendo la web n’asturianu. Tenemos dalgunos entrenadores que falen n’asturianu y prestaríanos fomentar esa parte, como facemos col inglés: qu’haya entrenadores que puedan facer entrenamientos n’asturianu como los hai que los pueden facer n’inglés, porque al final somos un equipu d’Asturies».
