El programa ‘Afinidaes eleutives. Alcuentros lliterarios en llibreríes’ entamáu pol Ministreriu de Cultura y Deporte llega esti añu a siete llibreríes independientes asturianes, ente elles dos de Xixón; Pablo Fraile y Francisco ‘Paco’ Álvarez van aldericar con escritores en castellanu y eusquera
Nel 2021, la Direición Xeneral del Llibru, del Cómic y de la Llectura del Ministeriu de Cultura y Deporte incorporó per primer vez al asturianu nel so programa ‘Afinidaes eleutives. Alcuentros lliterarios en llibreríes’, programa que pretrende impulsar l’actividá en comercios independientes y poner en valor la pluralidá lingüística, favoreciendo’l diálogu ente autores en diferentes idiomes del Estáu y contribuyendo a la difusión de lliteratura. Una iniciativa que tuvo una gran receición n’Asturies y qu’ayudó a llevar les lletres asturianes a otros autonomíes, y qu’esti añu repite cola participación de siete negocios, la práutica totalidá en setiembre —yá hebo una actividá previa en xunetu—, y catorce escritores.
En Xixón son La Madriguera y La Revoltosa les dos inscrites a esta iniciativa. La llibrería especializada en lliteratura infantil ye debutante na mesma y va recibir el sábado 20, n’horariu confirmáu a les 12 hores, a Inma Borges, autora venezolana residente en Barcelona, que va a conversar con Pablo Fraile sobre la valentía y sobre’l cuentu a partir de les sos llibros ‘La falda morada de Leo’ y ‘El cantar de la Reina Unicorniu’, de manera respeutiva. «Entrambes obres cuenten histories que frayen estereotipos y nes que los sos protagonistes s’atreven a ser valientes y desafiar lo establecío», destaquen dende La Madriguera.
Pela so parte, l’asitiada na cai Juan Alonso va axuntar a Francisco ‘Paco’ Álvarez cola guipuzcoana Uxue Alberdi, autora n’eusquera, el sábadu siguiente, día 27. El restu de llibreríes participantes son les uvieínes Matadero Uno, con Aratnza Margolles y l’escritor en castellanu Abel Aparicio‘l vienres a les 19 hores, y Kafka & Co, con Xaime Martínez y Alba Cid (gallegu), el sábadu 20 a les 13 hores; la mierense La Pilarica, el xueves 25, con Francisco Priegue y Emma del Pilar Pedreira (gallegu); y l’avilesina La Crisálida, el vienres 26, con Daniel García Granda y Àngels Gregori (valencianu).
