El llunes 30 dellos autocares van llevar a la capital del Estáu a maestros y maestres de l’asignatura pa reclamar la creación de la especialidá de Llingua Asturiana y Gallego-asturiano; ADAE llama a concentrase frente a la sede ministerial y el Congresu pa esixir que se dean «los pasos necesarios pa modificar la normativa»
«Los derechos llaborales del profesoráu de Llingua Asturiana y Eonaviego/Gallego-asturiano nun pueden siguir esperando», apunten los cartelos que llamen a la movilización de los maestros y maestres de la materia, una serie d’aiciones qu’entamó con un zarru’l día 5 nel xixonés CP Cabueñes. Agora dan un pasu más y treslladen la so protesta pola creación de la espalidá docente a Madrid, que yá tien fecha: el llunes 30. La convocante Asociación de Docentes d’Asturianu y Eonaviego/Gallego-asturiano (ADAE) organiza pa esi día una concentración doble, frente al Ministeriu d’Educación, Formación Profesional y Deportes, primero, y a la puerta del Congresu, depués.
«La última palabra tienla’l ministeriu», espliquen estos profesores que nun tienen opción d’opositar p’acceder a plaza, condenaos asina a la interinidá, d’ehí la so decisión de garrar carretera y viaxar a Madrid pa reclamar que «entame los trámites pa modificar los reales decretos que regulen les especialidaes docentes». D’igual forma, miren al Gobiernu asturianu, al que-y soliciten que «esixa con contundencia una solución y dea nuevos pasos nesta dirección, yá sía per aciu d’un pidimientu formal p’abordar el cambéu normativu o, si persistiere la negativa, solicitando un informe al Conseyu d’Estáu». D’esti mou ADAE apuntó nel anunciu de la convocatoria que «vamos confiar nel Gobiernu del Principáu, pero si nun vemos meyores vamos volver movilizanos n’Asturies» al tener l’Executivu «responsabilidá política» nesta situación.
«Ye una inxusticia que nun puede siguir allargándose», denuncien los maestros, qu’insisten en que «la enseñanza del idioma ye imprescindible pa garantizar la so pervivencia, y la estabilidá del profesoráu ye la base d’una enseñanza de calidá», d’ehí la urxencia de «avanzar haza un marcu que dexe reconocer les especialidaes docentes y asegurar unes condiciones llaborales equiparables al restu del profesoráu». Los autocares pa Madrid van salir a les 6 hores, con vuelta prevista pa les 17, y les places son de baldre: «Facemos un llamamientu a tola comunidá educativa y a la sociedá asturiana a acompañanos a Madrid», conviden.
