22 de los 43 diputados del Parllamentu presentes votaron a favor de modificar la norma autonómica pa incluyir el reconocimientu de los derechos de los falantes d’asturianu y eonaviego; PP, Vox y Foro foron les fuercies que s’opunxeron a la propuesta que necesitaba tres quintos de la Cámara, esto ye, 27 votos
El Plenu de la Xunta Xeneral votó na sesión d’esta mañana’l dictame de la Proposición de Reforma de la Llei Orgánica 7/1981, 30 d’avientu, d’Estatutu d’Autonomía del Principáu d’Asturies, pa la declaración de la oficialidá del asturianu y del eonaviego, que nun salió alantre al nun algamar el sofitu de los tres quintos de la Cámara necesarios, esto ye, 27 ‘sís’ de 45 posibles. Finalmente la modificación de la norma autonómica pa incluyir el reconocimientu de los derechos de los falantes d’asturianu y eonaviego n’igualdá colos de castellanu sumó 22, lo que supón una mayoría parllamentaria. Nun acudieron a la sesión dos diputaos, ún de cada ‘bloque’.
Nun hebo cambios de postura dende la toma en consideración de la propuesta. El PSOE, Convocatoria por Asturies (Izquierda Xunida-Más País-IAS) y Cova Tomé, eleuta por Podemos, foron les formaciones favoratibles, con Partido Popular (PP), Vox y Foro en contra. El diputáu de la formación asturiana, Adrián Pumares, que, como ye mui habitual, emplegó la llingua asturiana na so intervención, acusó al PSOE de llevar la reforma a la Cámara «ensin dar un solu pasu en beneficiu del consensu» y aseguró que «si-y importase de verdá futuru del asturiano, güei taríemos falando de cómo poder reformar la Llei d’Usu, que llevá yá más d’un cuartu de sieglu de vixencia y que, evidentemente, nun respuende a la realidá sociollingüística del Principáu d’Asturies. Taríemos falando de cómo poner en marcha un Plan de Normalización Llingüística que tuviese conteníu, que tuviese presupuestu y que tuviese tamién indicadores midibles».
La socialista Noelia Macías aseguró qu’esta votación «nun ye’l puntu final de nengún camín, porque esti camín pa la cooficialidá yá nun tien marcha atrás» y destacó que «namás la oficialidá garantiza, como prevé la Constitución, la llibertá d’usu llingüísticu». «Vustedes saben que la sobrevivencia del asturianu y del eonaviego pasa pola oficialidá”, apuntó pa después señalar «l’asturianismu impostáu y ficticiu» del PP con esti asuntu, «buscando namás la confrontación».
«Asturiano sí, obligatoriedad no», caltuvieron los populares na so intervención, que protagonizó José Luis Costillas. L’ex políticu de Ciudadanos consideró que «la realidad de Asturias es distinta a la de otras comunidades autónomas con lenguas cooficiales», asegurando que «no se dan aquí las mismas circunstancias que se dan y se dieron» en dichos territorios. Pela so parte, Vox, na boca de Carolina López Fernández, dio continuidá al so discursu negacionista pa coles llingües propies d’Asturies.
«Por más que dalgunos quieran carauterizar la oficialidá como un problema, la esperiencia d’otros territorios, de los nuestros vecinos gallegos, amuésanos que la oficialidá ye un actu de madurez democrática, de cohesión social y d’arriquecimientu cultural y económicu», espuso pela so parte Xabel Vegas, de Convocatoria por Asturies. «El de güei ye un pasu más nel reconocimientu pleny de la nuestra asturianidá. Tres esta propuesta que debatimos güei en Plenu, dalgunos dirán que fallida, sicasí, saldremos más fuertes», señaló mientres Tomé.
