Depués de celebrase l’añu pasáu nuna carpa en L’Atalaya, llueu de la negativa del Muséu del Pueblu d’Asturies d’acoyer esta gran espicha de Selmana Santa que nació va 15 años «pensada pa esi espaciu», l’eventu sidreru recibe agospiu na Feria
Avérase la Selmana Santa, sinónimu en Xixón de sidra dende va 15 años gracies a la Primer Sidre l’Añu, l’eventu que la Fundación Asturies XXI, editora de la revista ‘La Sidra’, vien celebrando pa recuperar la tradición de les espiches d’esta época del añu. Miles de persones axúntense per cuatro díes, de Xueves a Domingu Santu, pa prebar la sidra nuevo, ensin trasegar, de más de mediu centenar de llagares, amás de participar en diferentes actividaes, nuna gran folixa que tien nuevu llar esta edición onde festexar la declaración de la cultura sidrera asturiana a Patrimoniu Cultural Inmaterial pola UNESCO.
La XV Primer Sidre l’Añu va celebrase nel Recintu Ferial Luis Adaro, ganando asina l’espaciu que perdió l’añu pasáu na carpa de L’Atalaya nuna organización a contrarreló depués de la negativa del Muséu del Pueblu d’Asturies d’acoyer l’eventu. «Solicitamos nuevamente’l Pueblu d’Asturies porque ye’l llugar qu’entendemos natural pa la Primer Sidre, que nació pensada pa esi espaciu. Nun recibimos respuesta», asegura Llucía Fernández Marqués, de la revista ‘La Sidra’. Naquella ocasión la organización refugó la plaza de toros y vio rechazada la propuesta d’ocupar el Parque Inglés (Parque de los Hermanos Castro) «porque’l nuesu eventu molestaba a los vecinos porque facíamos ruíu, cuando nós acabamos a les 9 de la nueche y otros eventos que se faen ehí son tola nueche», atopando darréu un bon recibimientu en Cimavilla, y nésta la opción valorada dende un primer momentu como alternativa foi la Feria, «que tien les mesmes ventaxes que’l Pueblu d’Asturies y dalguna más».
«La idea ye ocupar un pabellón y los praos esteriores a él, de manera qu’haya una zona al aire llibre y una zona grande techao pa qu’en casu de lluvia tar mui ampliamente. La carpa sólo tenía techao y nel Pueblu d’Asturies taba práuticamente tou albentestate; agora vamos tener les dos opciones», valora Fernández Marqués, que celebra que se pueda recuperar asina la esencia de la Primer Sidre l’Añu. «Facelo nuna carpa, aparte de qu’estéticamente ye feo, limita munchísimo les actividaes. Nun te pues poner a xugar a tiru cuerda nin facer carreres de sacos, y los nenos son una parte mui importante pa nosotros dientro de la programación, porque lo que tratamos ye recrear esi ambiente de la fiesta de prau, de la espicha, a la que tradicionalmente se va en familia. Mientres los padres lo pasen bien tomando sidre, los guaḥes pásenlo bien xugando a esportes tradicionales, entós pa nosotros yera mui importante recuperar esi ambiente. Esto nun ye una fiesta de botellón, de venir a beber y enfilase; ye una fiesta de disfrutar en sociedá y ehí tienen que tar dende los grupos de chavalinos a los nenos pequeños, a les families, a les pareyes mayores que van tranquilamente. Tien qu’haber espaciu pa toos y ye lo que tratamos de buscar», rescampla.
La intención pa esta edición de la Primer Sidre l’Añu, que va tener llugar ente’l 17 y el 20 d’abril, ye la de caltener el preciu de 10 euros, lo que da accesu a prebar la sidra de tolos llagares participantes. Amás, van tar a la ventar vasos de cristal pa poder beber el productu en condiciones.
