«Ye una figura fundamental pa entender tol movimientu de reivindicación y pa vertebrar la diáspora asturiana», rescampló la conseyera Gutiérrez na biblioteca de Miranda, conceyu de nacencia del homenaxáu nesta edición; Uviéu acueye esti martes la estrena d’un documental sobre la so figura que se va poder ver en TPA
La gran fiesta de la nuesa lliteratura yá ta en marcha. El ‘Conciertu de les Lletres Asturianes’ a cargu de la Orquesta Sinfónica del Principáu d’Asturies (OSPA), con pieces de Falla, Bizet, Luna, Korsakov y Lauret baxo la direición d’Óliver Díaz, sirvió d’avance’l vienres, anque la inauguración oficial tuvo llugar ayeri en Miranda, conceyu de nacencia, de Xosé Álvarez ‘Pin’, autor a la qu’esta dedicada la XLVI Selmana de les Lletres Asturianes.
Nacíu nel 1948 en Cigüedres, Pin ye ún de los escritores más reconocíos de la lliteratura de la emigración. Viaxó de pequeñu a Arxentina cola so madre y, yá rapaz, crució’l ‘charcu’ de vuelta a Europa, a Madrid. Ellí formó parte del Conceyu d’Asturies en Madrid, coleutivu creáu nel 1976 que llegó a presidir y nel que participaron nomes bien conocíos como Neto, Pepa Fernández, Xicu Yepes, Xulio Ramos, Roberto González-Quevedo, Carme Tineo, David Rivas o Llarina Rodríguez, ente otros munchos. Tamién participó en proyeutos políticos dientro del nacionalismu d’izquierda qu’arrancaron na década de los 80. Col cambiu de sieglu regresó al activismu llingüísticu y cultural, cola idea de reactivar el Conceyu d’Asturies en Madrid, pero nel 2001 finó de sópitu en Cigüedres, onde pasaba unos díes.
No lliterario, adelantóse cuasi una década al Surdimientu, del que ye consideráu’l primer narador realista, escribiendo’l so primer cuentu n’asturianu nel 1966, con 18 años. Nel 1973 gana’l concursu de cuentos en llingua asturiana que convocó’l Muséu del Pueblu d’Asturies en Xixón por iniciativa de l’Asociación d’Amigos del Bable, y el so primer llibru llegaría nel 1980, ‘El bable de Xuanín ia outrus cuentus’, editáu en Madrid. Siguieren-y ‘Fíos de naide’ (1981), ‘Cuentos de nós’ (1983) y ‘Los tres reis (cunuciendo los nuesus animales)’ (1983), ún de los primeros llibros infantiles n’asturianu. Nel 2011, diez años depués de la so muerte, l’Academia de la Llingua Asturiana (ALLA), de la que foi miembru correspondiente dende la so creación, espublizaría el so ‘Vocabulariu de Miranda’.
«Pin ye una figura fundamental pa entender tol movimientu de reivindicación y pa vertebrar la diáspora asturiana», rescampló ayeri Ana Vanessa Gutiérrez, conseyera de Cultura, Política Llingüística y Turismu en Balmonte na inauguración de la XLVI Selmana de les Lletres Asturianes, qu’añadió que la emigración asturiana foi «recuperadora y difusora de la cultura y de la llingua asturiana». Tuvo acompañada en Balmonte por Antón García, direutor xeneral d’Aición Cultural y Normalización Llingüística, y pol alcalde de Miranda, Gilberto Alonso, nuna xornada emotiva na que se descubrió una placa dedicada al autor na biblioteca y s’inauguró la esposición ‘Xosé Álvarez, Pin: sentimientu de la tierra’ con presencia de muchos collacios y compañeros del Conceyu d’Asturies en Madrid. Pela tarde, Rafa Lorenzo dio un conciertu nel Centru Sociocultural de Balmonte y estrenó un cantar dedicáu al autor de Cigüedres.
Actividaes n’Uviéu, Candás, Tapia y Madrid
Como ye vezu, la Selmana de les Lletres Asturianes vien cargada d’actividaes per tola xeografía asturiana. Esta tarde, a les 19 hores na Biblioteca d’Asturies ‘Ramón Pérez de Ayala’, va proyeutase per primer vegada’l documental ‘Xosé Álvarez y el Conceyu d’Asturies en Madrid’, que va emitir TPA a les 23.12 hores. Tamién va presentase la obra conmemorativa d’esta edición de la gran fiesta de la nuesa lliteratura ‘Xosé Álvarez, Pin. Asturies siempre’, que se podrá consiguir el vienres, XVLI Día de les Lletres Asturianes, en mediu centenar de llibreríes de la comunidá mercando un llibru o discu n’asturianu, que van tener un descuentu del 10%. Nel casu del eonaviego, va entregase de baldre la obra ‘El equilibrio delicado del funámbulo’ de Conchita Álvarez Lebredo.
Mañana, el Teatru Prendes de Candás acueye a les 10.30 hores l’actu de reconocimientu a los ganadores de los diferentes certámenes escolares de la Selmana de les Lletres Asturianes, y el vienres, Día de les Lletres Asturianes, el protagonismu pasa a l’ALLA, qu’entama a les 19 hores nel uvieín Teatru Campoamor la so sesión estraordinaria con motivu d’esta xornada. Nel actu, la institución va recibir como académicos nuevos a Ruth González Rodríguez y Alberto Fernández Costales, y, como miembru correspondiente, a Paquita Suárez Coalla.
La llingua del occidente tamién tien presencia nesta celebración. Asina, el sábadu va entamase’l tradicional ‘Homenaxe ás nosas lletras’ con un actu nel Auditorio de Tapia dende les 18 hores que va consistir na presentación de la obra d’Álvarez Lebrerdo y na representación del espectáculo de danza contemporánea ‘El viaxe del andolía’ por Nun Tris Producciones.
Por último, el miércoles 14 de mayu, Madrid tamién va participar del homenaxe a Pin con un actu nel que va presentase de la obra ‘Per toa tierra’, una antoloxía lliteraria sobre la emigración asturiana, coordinada pola historiadora Arantza Margolles. Va ser a les 19 hores nel Centro Asturiano de Madrid.
Otra manera, son munchos los conceyos qu’entamen actividaes propies esti mes por esta celebración al traviés de los sos Servicios de Normalización Llingüística. Ye’l casu de Mieres, Avilés, Corvera, Cangas del Narcea y los de la Mancomunidá de la Sidra.
Pue consultar la programación completa pol XLVI Selmana de les Lletres Asturianes nesti enllaz.
