«Representó un retu pol tamañu», apunta la organización del eventu sidreru, que repartió 17.000 llitros de la bébora asturiana nos cuatro díes d’espicha nos que rescampló la importante presencia «de reciella y xente mozo»
Había nervios por treslladar un modelu d’ésitu creáu pa un recintu como’l Muséu del Pueblu d’Asturies per primer vez a otru más grande unos metros un poco más allá, al Recintu Ferial Luis Adaro, después d’una edición entamada d’urxencia en Cimavilla énte la negativa de la dirección del recintu museística de ceder el tendayu pa una edición más de la Primer Sidre l’Añu, pero les ganes de disfrutar de la sidra y la so cultura pueden con too y el público tornó a convertir nuna gran folixa la gran espicha de Semana Santa de Xixón, que nun arrenuncia a volver a los sos oríxenes nel futuru. Asina, más de 10.000 asistentes adultos pasaron pel llugar nos cuatro díes de celebración magar que’l tiempu nun acompañó en munches xornades, con agua n’ocasiones que nun impidió la fiesta gracies al ampliu espaciu cubiertu que facilitaba’l nomáu Pabellón d’Asturies.
«Superamos el retu de facer una Primer Sidre l’Añu entá más grande, con un espaciu munchu mayor qu’enllenemos de sidre, xente y bon ambiente, ensin dengún percance porque equí la xente bien a pasalo bien y a esfrutar de la cultura asturiana de la sidre», apunta Llucía Fernández Marqués, de la revista ‘La Sidra’ y la Fundación Asturies XXI, organizadora del eventu, que rescampla «l’alta presencia de reciella. non contabilizada nos datos d’asistencia, y de xente mozo». Nesi sen, «consideramos qu’un de los ésitos d’esti eventu ye averar a la mocedá a la sidre, algo que lleva años diciéndose dende los llagares que ye necesario».
En total repartiéronse 17.000 llitros de sidra en 33 hores de barra llibre, de gaites y de xuegos tradicionales. Amás entamáronse 12 tasties guiaes de sidre, 12 prebes de productos de ‘Alimentos del Paraísu’, cuatro conciertos, un monólogu, cuatro presentaciones de llibros y cuatro conferencies. Otra manera, instaláronse nel llugar cinco puestos d’artesanía en direuto y, nel esterior, ún de comida, y celebróse una edición nueva del Concursu de Sidre Casero Fecho en Maera, que contó con 24 participantes. «Habría que destacar tamién l’altísimu interés que despertaron les tasties, tanto de sidre comu d’alimentos, nos que’l comentariu más xeneralizau yera ‘esto nunca lo probare, ¿ónde se merca?’, lo que pon de manifiestu hasta que puntu son desconocios los nuesos productos de mayor calidá», apunta Fernández Marqués, satisfecha pol resultáu d’una edición que «representó un retu pol tamañu».
