El domingu a les 12.30 hores, cuando alborez nel mar de los Sargazos, va entamase una videoconferencia nel que los neños presentes van poder falar con esti personaxe navidiegu que reparte regalos en Nuechebona
‘L’Angulina’ yá ta preparada pal llargu viaxe a Asturies qu’entama L’Anguleru tolos años nes selmanes previes a Navidá. La barca del personaxe navidiegu asturianu va partir esti domingu direición este y toles neñes y neños van poder siguir la so salida en direuto dende’l Bioparc Acuario de Gijón. A les 12.30 hores va tener llugar la conexón vía satélite, nel momentu nel qu’alborez nel mar de los Sargazos, pola diferencia horaria esistente. Un primer alcuentru, yá tradicional nesta instalación xixonesa, qu’espierta la ilusión de los más pequeños, que van tener la oportunidá de falar col pescador en direuto.
Per delantre-y quedarán a L’Anguleru dos selmanes de travesía pel Atlánticu hasta aportar a la costa asturiana, llegada prevista pal 5 d’avientu. Mientres llega esi día, el personaxe navidiegu que reparte regalos peles cases d’Asturies en Nuechebona coles perres que gana de pescar angula nel solsticiu va contar con una ‘oficina’ permanente nel Acuariu na que va recibir toles cartes y pidimientos de los neños.
