L’equipu de baloncestu con orixe nel Elisburu lleva más d’un cuartu de década puxando por esti deporte na ciudá, con equipos masculinos y femeninos en toles etapes formatives hasta sumar 450 xugadores, inclusive los dos senior que van buscar l’ascensu «cola cantera»
El baloncestu ye un deporte con tirón na ciudá. Son munchos los neños y neñes que prautiquen esta modalidá deportiva de la mano de los diferentes club activos, ente ellos el Club Baloncesto Pumarín. «Tenemos too: padres, madres, dos equipos senior masculino, dos equipos senior femeninos, dos ‘junior’ masculín y femenín, tres cadetes masculinos y dos femeninos…», enumera Carlos Blanco, el so presidente, hasta llegar a los sub-9. «Más los coles, agora mesmu Elisburu, Asturias, Llano y Escuelona. Consiguimos sacar una llinia nel Liceo y tenemos institutos como’l Calderón, el Jimena, el Jovellanos y el Rosario Acuña, que ye nuevu. Tán llamándonos de munchos sitios», añade’l dirixente. «Son 450 xugadores en tola estructura”, a lo qu’hai que sumar «26 entrenadores ensin contar colexos», cifra.
Pumarín sigue siendo’l corazón d’un club que nació al rodiu del Elisburu, anque’l so crecimientu algama yá dellos barrios. «Fúndase nel 99 como Antiguos Alumnos del Elisburu por muncha xente que tuviera vinculada al colexu que venía de la cantera del Gijón Baloncesto, y del Elisburu, Llano, Pidal, Asturias…, cuando’l Gijón Baloncesto quita les categoríes inferiores. Nun entamu foi sólo senior, colos estatutos del AMPA del colexu. Ascendieron esi mesmu añu y llueu otra xente que creamos otru club, que llamamos Fenómenos, yá fuimos hacia Pumarín, que yá camudara’l nome y tenía un equipo ‘junior’ y nun sé si yá’l senior femenín». Dende entós la entidá tuvo un crecimientu constante hasta llegar al nivel d’anguaño, con equipos en toles categoríes y con colexos onde se formen xugadores col oxetivu de competir y llegar al primer equipu. «Esta temporada pasada llegamos a 12 finales a cuatro», destaca.
Y nésta l’oxetivu ye dar el saltu de categoría colos dos senior, a EBA y Nacional femenina, pero con una consigna clara: «cola cantera». «Queremos xubir na pista y con mayoritariamente chavales. El nuesu equipu masculín de Nacional tien una media de 20 años y el femenín quedó terceru, pero con xente de la casa. Nun veo sentíu trayer xente de fuera en Nacional, hai que dexar sitiu», entiende Blanco, un mensaxe importante pa la base, consciente de que la puerta de los primeros equipos ta abierta. L’apuesta pol trabayu dende abaxo tamién se ve nel restu d’equipos, como nel ‘junior’ femenín de segundu año, «nel que’l 80 % lleva con nosotros dende los 9 años».
El facer club ye daqué importante nel Pumarín. «La nuesa obligación ye enseñalos a xugar» y, pa ello, la figura del entrenador ye fundamental, con una estructura con téunicos titulaos que se completa con un coordinador pa los colexos, tres preparadores físicos y la figura d’una ‘coaching’ «pa intentar favorecer tamién el so bienestar mental». Pero pa crear identidá la entidá considera tamién importante «les esperiencies». «Salimos muncho pa fuera, yá fuimos a Torrelavega y dos veces a Lleón, a torneos y amistosos, y fiximos un campeonatu l’añu pasáu nel que participaron 1.200 xugadores. Ye una manera de facer convivencia y crer sentimientu de pertenencia», destaca.
El logu de Xixón nes camisetes
La llingua asturiana tien presencia nel Pumarín, nes sos equipaciones, y la intención ye que vaya a más. «Llevamos el logu de Xixón nes nueses camisetes nueves y prestaríanos facer publicaciones n’asturiau como fai’l Círculo. Nun nos atrevemos entovía pol mieu a meter la pata y vendríanos bien daquién que controlara d’esti tema. De fechu, miramos el tema de les ayudes esistentes, pero entovía nun nos atrevimos a dar el pasu», apunta’l presidente de la entidá nestos tres llustros últimos.
Entrugáu pola principal dificultá qu’atopa’l club, Blanco nun dulda n’afirmar que «la falta d’instalaciones, sobre manera en canasta grande, porque en pequeña colos colexos vas arreglándote». Perchera-La Braña ye onde’l Pumarín desenvuelve la so mayor actividá, pero con respeuto a los mayores «siempre intentamos que xueguen na central del Palacio o en La Teyerona». «Hai equipos que tienen preferencia, como’l Círculo o’l Fodeba poles esixencies de parqué o canastes en suelu, y otros deportes como’l balonmanu», esplica’l presidente.
«Nun puedes crecer más o facer meyor les cosas precisamente poles instalaciones, porque hai una absoluta falta d’elles anguaño. Hai munchos deportes, faise munchu deporte por suerte, munchos equipos, pero ye un gran problema pa nós. Dalgunos de los nuesos equipos tienen sesiones d’una hora porque nun consiguimos sacar hores pa toos», esplica Blanco, que recuerda’l pequeñu tamañu de los módulos en Perchera-La Braña, lo que dificulta’l progresu de los xugadores. «Gustaríanos disponer de La Teyerona como disponemos de Perchera, porque hai tres módulos, ximnasiu… Queremos dir a otres partes de la ciudá», asegura. Una manera de siguir llevando’l nome del barriu per tou Xixón y toa Asturies y, sobre manera, de fomentar el deporte y el baloncestu.
