Conciertos, meses redondes y exhibiciones van desenvolvese per dos díes, el llunes y el xueves 11, en Xixón nes Xornaes de la Música Tradicional Asturiana; la Banda Gaites Llacín va poner el conciertu de clausura nuna cita con 260 participantes, nomes destacaos de la escena y gaiteros internacionales
José Ángel Hevia, Lisardo Lombardía, Xuacu Amieva, José Manuel Tejedor o Vicente Prado ‘El Praviano’, xunto a representantes d’escueles de música y gaiteros d’otres partes del mundu, son dalgunos de los participantes nes Xornaes de la Música Tradicional Asturianu, eventu entamáu pol Conceyu de la Gaita y la Conseyería de Cultura, Política Llingüística y Deporte p’abrir espacios de diálogu, reflexón y divulgación sobre esta manifestación artística, centrándose nesta primer edición nes escueles y na gaita. Va desenvolvese el llunes y el xueves viniente, día 11, na xixonesa Llaboral y va contar con conciertos, meses redondes y exhibiciones d’accesu llibre previa inscripción.
La conseyera Ana Vanessa Gutiérrez, que na presentación celebrada ayeri na propia Llaboral señaló que la música tradicional ye «un pegollu fundamental sobre’l que se sustenta la identidá asturiana», va abrir les xornaes a les 10 hores enantes de la primer mesa de les cuatro previstes, ‘L’aniciu de les escueles de música tradicional n’Asturies: los años 70 y 80’, cola participación d’Hevia, Amieva, Pedro Pangua, Santi Caleya y, per videu, del gallegu Carlos Núñez, baxo la moderación de Flavio Rodríguez Benito. Darréu, a les 11, Lombardía y la presidenta de Sonerion, la confederación de gaiteros bretones, Maïna Daouphards, van aldericar sobre ‘Modelos d’enseñanza de música tradicional n’Europa: Bretaña, el casu Sonerion’, con Esteban González Corteguera como moderador.
Diferentes representantes d’escueles tradiciones, municipales y privaes, van, a les 12.30 hores, depués d’una posa, a tratar el tema ‘Les escueles de música tradicional anguaño: retos y desafíos’, mentes que pela tarde, a les 18 hores, va entamase nel Teatru de la Llaboral un ‘Alcuentru d’agrupaciones d’escueles municipales y tradicionales de música’ de diferentes puntos d’Asturies y La Tarabica, de la población madrileña de Guadarrama.
La gaita, protagonista
El xueves, mentes, la gaita va ser la protagonista. A les 11 hores va tener llugar una mesa redonda baxo’l títulu ‘La fabricación de les gaites anguaño: presente y llinies d’investigación’ cola presencia de Berto Fernández, El Pravianu, Chus Solís, Iván González y David López, conducida por Susana de la Cruz. La Sala de Pintures, a les 17 hores, va acoyer les ‘Muestres-conciertu d’intérpretes: gaites del mundo’, col asturianu Tejedor, l’escocés Fred Morrison, el gallegu David Bellas, el belga Jean-Pierre Van Hees y la italiana Zampognòrchestra, actu que va presentar Rodrigo Fernández Joglar, pa depués poner el pieslle, a les 20 hores, nel Teatru de la Llaboral, la Banda Gaites Llacín coles temes del so tercer discu, ‘Resollu’, presentáu en xunu en Llanes con un conciertu nel que participaron un centenar de músicos. Luis Álvarez Pola va presentar a la formación llanisca.
